ԵՐԵՎԱՆ, 5 օգոստոսի – Sputnik. ՀՀ Սյունիքի մարզի տարածքով անցնող ընդհանուր օգտագործման պետական ավտոմոբիլային ճանապարհների վրա 2 օրում կշռվել է ծանրաքաշ և մեծ եզրաչափերով բեռնափոխադրում իրականացնող 198 տրանսպորտային միջոց։ Տեղեկությունը հայտնում է ՀՀ քաղաքաշինության, տեխնիկական և հրդեհային անվտանգության տեսչական մարմնի մամուլի ծառայությունը։
Գերատեսչությունը ծանրաքաշ, մեծ եզրաչափերով բեռնափոխադրումներ իրականացնող տրանսպորտային միջոցների կշռման գործընթացն իրականացրել է օգոստոսի 4-ին և 5-ին՝ 24-ժամյա ռեժիմով։
«Մասնավորապես՝ օգոստոսի 4-ին Սյունիքի մարզի տարածքով անցնող ՀՀ ընդհանուր օգտագործման պետական ավտոմոբիլային ճանապարհների վրա կշռվել է ծանրաքաշ և մեծ եզրաչափերով բեռնափոխադրում իրականացնող 𝟏09 տրանսպորտային միջոց։ Արդյունքում 6 տրանսպորտային միջոցի վարորդների նկատմամբ կազմվել են վարչական իրավախախտման վերաբերյալ արձանագրություններ»,– ասված է հաղորդագրությունում։
Օգոստոսի 5-ին մշտադիտարկվել է 89 տրանսպորտային միջոց։ Արդյունքում գերբեռնված տրանսպորտային միջոցներ չեն հայտնաբերվել։