Մեկնարկել են Իսահակյան-Գյումրի ավտոճանապարհի մի հատվածի հիմնանորոգման աշխատանքները

ԵՐԵՎԱՆ, 5 օգոստոսի – Sputnik. Մեկնարկել են Հ-75, Մ-9-Իսահակյան-Գյումրի-Մ-7 հանրապետական նշանակության ավտոճանապարհի հիմնանորոգման աշխատանքները։ Տեղեկությունը հայտնում է Ճանապարհային դեպարտամենտ հիմնադրամը։

Նշվում է, որ հիմնանորոգվում է ճանապարհի կմ 45+300-կմ 60+200 հատվածը։

Շիրակի մարզով անցնող մոտ 15կմ երկարությամբ ճանապարհին այս պահին կատարվում է հին պատվածքի քանդում։

Կհիմնանորոգվի երթևեկելի մասը, կտեղադրվի ասֆալտբետոնե նոր ծածկ, կնորոգվեն ճանապարհին առկա ուղեանցներն ու կամուրջները։

Հիմնանորոգվող ճանապարհը միմյանց է կապում Շիրակի մարզի մի շարք բնակավայրեր։

Շինաշխատանքները կատարվում են ՀՀ պետական բյուջեի միջոցներով։