Հայ-վրացական «Բարեկամություն» կամուրջը փորձնական գործարկվում է. մանրամասներ

Հայ-վրացական «Բարեկամություն» կամուրջը
Կամրջի բացման պաշտոնական արարողությունը կլինի մոտ ապագայում։
Sputnik
ԵՐԵՎԱՆ, 5 օգոստոսի – Sputnik. Սադախլո-Բագրատաշեն անցման կետում կառուցվող հայ-վրացական «Բարեկամություն» կամուրջն այժմ փորձնական գործարկվում է։ Sputnik Արմենիայի հետ զրույցում տեղեկությունը հայտնեց կամրջի շինարարության ծրագրի ղեկավար Իզաբելլա Մուրադյանը։
«15 օր է` երթևեկությունը անցկացվում է բացառապես նոր կամրջով, հին կամուրջը փակվել է, ոչ մի տեխնիկական խնդիր դեռ չի եղել», - ասաց նա։
Այժմ պայմանագրային վերջին փուլն է՝ որակի թեստավորման գործընթացը։ Կամրջի բացման պաշտոնական արարողությունը կլինի մոտ ապագայում։
Մուրադյանը նշեց, որ այս կամուրջը անհրաժեշտություն էր երկու երկրների համար, քանի որ նախորդ՝ խորհրդային տարիներին կառուցված կամուրջը չէր կարողանում ապահովել ամբողջ երթևեկությունը։
«Նորը շուրջ չորս անգամ ավելի երթևեկություն է ապահովում։ Կա երկու կամուրջ, յուրաքանչյուրը մի ուղղությամբ է գնում, ամեն մեկն ունի երկու գոտի։ Մի գոտին միայն բեռնատարների համար է, մյուսը՝ ուղևորափոխադրողների, ինչն էլ կբացառի մաքսայինի մոտ ուղևորափոխադրողների համար հերթերը», - ասաց նա։
Կամրջի կառուցման արժեքը ինը մլն եվրո է, Հայաստանը և Վրաստանը 50/50 ֆինանսավորել են այն՝ տրամադրելով չորսուկեսական մլն եվրո։
Հիշեցնենք` կամրջի շինարարությունը մեկնարկել է 2021 թվականի մայիսին։
Կառույցը բաղկացած է իրարից 1 մետր հեռավորության վրա գտնվող երկու զուգահեռ կամուրջներից, յուրաքանչյուր կամրջի լայնությունը 11.85 մ է, երթևեկելի հատվածի լայնությունը՝ 8.35մ, յուրաքանչյուր կամրջի երկարությունը՝ 160 մ:
Հայկական և վրացական կողմերը հետևել են Բագրատաշենի անցակետում նոր կամրջի շինարարությանը