ԵՐԵՎԱՆ, 3 օգոստոսի – Sputnik. Հունգարիան հաշվի է առնում ատոմակայանի ծառայության ժամկետը երկարաձգելու Հայաստանի փորձը։ Այս մասին Sputnik Արմենիայի հետ զրույցում ասել է ատոմային էներգետիկայի գծով հունգարացի փորձագետ Ժոլտ Խարֆաշը։
Հունգարիան, ինչպես Հայաստանը, սկսել է դիտարկել իր ԱԷԿ-ի շահագործման ժամկետը երկարաձգելու հնարավորությունը («Պակշ» կայանն ապահովում է Հունգարիայի էլեկտրաէներգիայի պահանջարկի մոտ մեկ երրորդը):
«Ինչպես և Հունգարիան, Հայաստանը ատոմային էլեկտրակայանների անվտանգ և երկարաժամկետ շահագործումը համարում է պետական կարևորության խնդիր։ Ռուսական բլոկների վերաբերյալ փորձի փոխանակումը շատ կարևոր է բոլոր երկրների համար, այդ պատճառով էլ ներկայումս մեր փորձագետները համագործակցում են»,- նշեց Խարֆաշը։
Նա հիշեցրեց, որ անցյալ տարի Հայաստանի մասնագետները մասնակցել են ՋՋԷՌ (Ջրաջրային էներգետիկ ռեակոտորներ) շահագործող երկրների Ատոմային կարգավորիչների համաժողովին (այստեղ ընդգրկված է 12 երկիր, այդ թվում՝ Ռուսաստանը, նախկին ԽՍՀՄ-ի և սոցճամբարի երկրները, ինչպես նաև Ֆինլանդիան): Բացի այդ, միջազգային համագործակցության շրջանակում հայ մասնագետները շարունակում են այցելել «Պակշ» ատոմակայան (այդ թվում ՝ ՄԱԳԱՏԷ-ի առաքելություններով) ։
Կայանի գործող չորս էներգաբլոկների շահագործման ժամկետն արդեն երկարաձգվել է և լրանում է 2032-ից մինչև 2037 թվականը: Բայց Հունգարիայի կառավարությունը որոշել է նախ ևս մեկ երկարաձգում նախաձեռնել։ Տեսականորեն գործող չորս «Պակշ» էներգաբլոկները կկարողանան աշխատել ևս 10-20 տարի։
Երկրորդ՝ որոշվել է կառուցել 2400 ՄՎտ հզորությամբ «Պակշ-2» կայանը։ Այն թույլ կտա փոխարինել տարեկան 4,5 մլրդ խմ գազի օգտագործումը։
Նա նշել է, որ Հունգարիայում էլեկտրաէներգիայի սպառումը շարունակելու է աճել, իսկ հնացած էլեկտրակայանները (օրինակ՝ ածուխով աշխատող- խմբ.) կփակվեն: Ուստի Հունգարիան պետք է ԱԷԿ-ում և արևային կայաններում էլեկտրաէներգիայի առավելագույն ծավալ արտադրի:
Խարֆաշի խոսքով` ռուս-ուկրաինական ճգնաժամի պատճառով սահմանված պատժամիջոցները Հունգարիայի կառավարությանը չեն խանգարում կառուցել «Պակշ-2»-ը։ Ներկայումս ընթանում է ծրագրի համար անհրաժեշտ լիցենզիաների ստացման գործընթացը։