ԵՐԵՎԱՆ, 13 հուլիսի – Sputnik. Ռուսաստանի Ռազմածովային նավատորմն ունակ է կայծակնային արագությամբ պատասխանել բոլոր նրանց, ովքեր կորոշեն ոտնձգություն կատարել երկրի ինքնիշխանության և ազատության դ։ Այս մասին հայտարարել է ՌԴ նախագահ Վլադիմիր Պուտինը Ռազմածովային նավատորմի օրվան նվիրված շքերթի ժամանակ։ Նրա խոսքերը մեջբերում է ՌԻԱ Նովոստին։
«Այստեղ առանցքայինը ռազմածովային նավատորմի հնարավորություններն են։ Այն ի վիճակի է կայծակնային արագությամբ պատասխանել բոլոր նրանց, ովքեր կորոշեն ոտնձգություն կատարել մեր ինքնիշխանության և ազատության դեմ»,-ասել է նա։
ՌԴ առաջնորդն ընդգծել է, որ ՌԴ ռազմածովային նավատորմը հաջողությամբ և պատվով է կատարում ռազմավարական խնդիրները երկրի սահմաններում և համաշխարհային օվկիանոսի ցանկացած հատվածում։
«ՌԾՆ-ն իր բոլոր միջոցներով ակտիվ գործողությունների բարձր պատրաստվածություն ունի։ Դրանք մշտապես կատարելագործվում են»,-նշել է Պուտինը։
Վլադիմիր Պուտինը հիշեցրել է, որ Ռուսաստանն իր Ծովային դոկտրինում նշել է, որ ապահովելու է անվտանգության խնդիրները։
«Հաստատվել է նաև Ռուսաստանի նոր Ծովային դոկտրինը։ Մենք բացեիբաց նշել ենք Ռուսաստան սահմաններն ու ազգային շահերի գոտիները»,-ընդգծել է նա։
Նրա խոսքով՝ խոսքն առաջին հերթին Արկտիկական ջրատարածքների, Սև, Օխոտի և Բերինգի ծովերի, Բալթիկ և Կուրիլյան նեղուցների ջրերի մասին է:
«Դրանց պաշտպանությունը կապահովենք ամուր կերպով և բոլոր միջոցներով»,-ասել է ՌԴ նախագահը:
Ռուսաստանում Ռազմածովային նավատորմի օրը նշվում է ամեն տարի հուլիսի վերջին կիրակի օրը։ Այս տարի Ռուսաստանի Ռազմածովային նավատորմը նշում է իր 326-ամյակը։ Բացի այդ, այս տարի նավատորմի կազմում ներառվել է «Բելգորոդ» ատոմային սուզանավը, որը «Պոսեյդոն» ստորջրյա միջուկային անօդաչուների առաջին փորձնական կրողը կդառնա։
Ինչպես հայտնում է Կրեմլի կայքը, Պուտինը «Ռապտոր» մոտորանավով, ՌԴ պաշտպանության նախարար Սերգեյ Շոյգուի, ՌԾՆ գլխավոր հրամանատար Նիկոլայ Եվմենովի և Արևմտյան ռազմական շրջանի զորքերի հրամանատարի ժամանակավոր պաշտոնակատար Վլադիմիր Կոչետկովի ուղեկցությամբ անցել է մարտական նավերի շարքի առջևով` Ֆիննական ծոցի ավազանում և Կրոնշտադի ռեյդի ընթացքում։
Ավելի վաղ ՌԴ ՌԾՆ գլխավոր հրամանատարի տեղակալ Վլադիմիր Կասատոնովը լրագրողներին հայտնել էր, որ այս անգամ շքերթին կմասնակցեն 47 նավ և 42 օդանավ: Իսկ Կրոնշտադի շքերթի ժամանակ զորահանդեսին կմասնակցեն «Սեվերոդվինսկ», «Մագադան» և «Վեպր» սուզանավերը: Նորամուծությունների թվում են կանանց անձնակազմն ու մեծ թվով առագաստանավերը։
Իսկ շքերթը կավարտվի Սենատի հրապարակի առափնյա հատվածով զորահանդեսային հաշվարկների հանդիսավոր անցումով: