ԵՐԵՎԱՆ, 30 հուլիսի – Sputnik. Սյունիքի նախկին մարզպետ Սուրիկ Խարատրյանի որդին` Տիգրան Խաչատրյանը, ազատ է արձակվել։ Տեղեկությունը «Ֆեյսբուքի» իր էջում հայտնել է Խաչատրյանի փաստաբան Բենիկ Գալստյանը։
«Այսօր քրեակատարողական հիմնարկից ազատ արձակվեց Տիգրան Խաչատրյանը։ Մայիսի 30-ին Տիգրանին ձերբակալեցին, այնուհետև ՀՀ քննչական կոմիտեի քննիչը Տիգրանին կալանավորելու միջնորդություն ներկայացրեց և բոլորիս հայտնի դատավոր Դավիթ Արղամանյանը, տեղյակ լինելով, որ Տիգրանը որևէ հանցավոր արարք չի կատարել, որոշեց, որ ամեն դեպքում պետք է 2 ամսով կալանավորվի»,– նշել է Գալստյանը։
Նրա խոսքով` Վերաքննիչ դատարանի դատավոր Ռուբիկ Մխիթարյանը նույնպես տեղյակ լինելով, որ Տիգրանը որևէ հանցավոր արարք չի կատարել, որոշել էր, որ նա պետք է մնա կալանքի տակ։
Հիշեցնենք` Տիգրան Խաչատրյանին ձերբակալել են մայիսի 30-ին` քրեական օրենսգրքի 316-րդ հոդվածի առաջին մասի հիմքով (իշխանության ներկայացուցչի նկատմամբ բռնություն գործադրելը)։ Նույն օրը ձերբակալվել էր նաև ՀՀ 3–րդ նախագահ Սերժ Սարգսյանի եղբորորդին՝ Հայկ Սարգսյանը։ Երկուսն էլ մասնակցում են «Դիմադրություն» շարժման հանրահավաքներին, մայիսի 30-ին ներկա էին կառավարության 3-րդ շենքի մոտ տեղի ունեցած դեպքերին։ Այսօր ազատ է արձակվել նաև Սերժ Սարգսյանի եղբորորդին` Հայկ Սարգսյանը։