ԵՐԵՎԱՆ, 29 հուլիսի – Sputnik. ԱՄՆ Կալիֆոռնիա նահանգի Սան Ֆրանցիսկո քաղաքում արտակարգ դրության ռեժիմ է հայտարարվել կապիկի ծաղիկ հիվանդության տարածման պատճառով։ Տեղեկությունը հայտնում է ՌԻԱ Նովոստին՝ հղում անելով քաղաքապետ Լոնդոն Բրիդին։
Հունիսի 3-ին քաղաքում գրանցվել է կապիկի ծաղիկով վարակվելու առաջին դեպքը, և այդ ժամանակից ի վեր վարակը տարածվում է:
Բնակչության համար ռիսկի աստիճանն ընդհանուր առմամբ ցածր է, քանի որ այդ հիվանդությունը չի տարածվում օդակաթիլային ճանապարհով։
Այդուհանդերձ, Սան Ֆրանցիսկոյի հանրային առողջապահության դեպարտամենտը որոշել է արտակարգ դրության ռեժիմ սահմանել, որպեսզի օգնի իշխանությանը ավելի լավ նախապատրաստվել հնարավոր բարդություններին:
Կապիկի ծաղիկը հազվագյուտ վիրուսային վարակ է, որը փոխանցվում է մարդկանց միջև սերտ շփման հետևանքով։ Վարակվածների մեծ մասը սովորաբար ապաքինվում է մի քանի շաբաթվա ընթացքում, սակայն որոշ բարդություններ, այնուամենայնիվ, հնարավոր են:
Հիվանդության գաղտնի շրջանը սովորաբար տևում է 5-21 օր, բնորոշ ախտանշաններն են՝ տենդ, սաստիկ գլխացավ, լիմֆատիկ հանգույցների մեծացում, ցավ մեջքի շրջանում, մկանացավ, արտահայտված թուլություն: Տենդի սկզբից 1-3 օր անց ի հայտ է գալիս ցանավորումը, ցանը սկսվում է դեմքի շրջանից և ապա տարածվում մարմնի տարբեր հատվածներում։ Վարակվելու ռիսկը բարձր է այն անձանց շրջանում, որոնք ֆիզիկական սերտ շփում ունեն կապիկի ծաղիկի ախտանշաններ ունեցող անձանց կամ վարակված կենդանու հետ: Մարդիկ, որոնք պատվաստվել են բնական ծաղիկի դեմ, որոշակի պաշտպանվածություն ունեն նաև կապիկի ծաղիկ հիվանդության դեմ:
Վարակը կարող է ավելի ծանր ընթանալ երեխաների և իմուն համակարգի խնդիրներ ունեցող անձանց շրջանում: Բուժաշխատողները նույնպես ավելի բարձր ռիսկի են ենթարկվում վիրուսների ավելի երկար ազդեցության պատճառով: