ԵՐԵՎԱՆ, 29 հուլիսի - Sputnik. ՌԴ ԱԳ նախարար Սերգեյ Լավրովը հեռախոսազրույց կունենա ԱՄՆ պետքարտուղար Էնթոնի Բլինկենի հետ։ Զրույցի թեման պարենային գործարքի պարտավորությունների կատարումն է լինելու։ Այս մասին ՇՀԿ ԱԳ նախարարների նիստից հետո լրագրողներին ասել է ՌԴ ԱԳ նախարար Սերգեյ Լավրովը, հայտնում է ՌԻԱ Նովոստին։
«Մենք խնդրել ենք ճշտել այն հարցերը, որոնք իրենք ցանկանում են քննարկել։ Ուկրաինական հացահատիկի մասով նույնպես հետաքրքիր կլիներ լսել, թե ինչպես են նրանք պատրաստվում կատարել այն պարտավորությունները, որոնք ստանձնել են ՄԱԿ-ի գլխավոր քարտուղարի նախաձեռնությամբ», - ասել է նա։
Լավրովն ընդգծել է, որ հենց ամերիկյան պատժամիջոցներն են Ռուսաստանին խանգարել իրականացնել այն պայմանագրերը, որոնք ստորագրվել են ռուսական նավերի անցման սահմանափակումների, ռուսական ծովային փոխադրումների ապահովագրության դրույքաչափերի խստացման, ինչպես նաև ֆինանսական շղթաների խզման պատճառով:
«ՄԱԿ-ի գլխավոր քարտուղարը պարտավորվել է վերացնել այդ խնդիրները, ինչպես իրենք են ասում, համաշխարհային տնտեսական ճգնաժամի լուծման ճանապարհին։ Դե տեսնենք», - ասել է նախարարը։
Հիշեցնենք, որ Ստամբուլում հուլիսի 22-ին տեղի է ունեցել բազմակողմ համաձայնագրերի ստորագրում ռուսական ապրանքների արտահանման մատակարարման սահմանափակումները վերացնելու և ուկրաինական հացահատիկի արտահանմանն աջակցելու մասին:
Գործարքը, որը ստորագրել են Ռուսաստանի, Թուրքիայի, Ուկրաինայի և ՄԱԿ-ի ներկայացուցիչները, ենթադրում է Սև ծովով ուկրաինական հացահատիկի, պարենամթերքի և պարարտանյութերի դուրսբերում 3 նավահանգստից, ներառյալ Օդեսան: