ԵՐԵՎԱՆ, 28 հուլիսի – Sputnik.Եթե մինչև շաբաթվա վերջ «Yan products» ապրանքանիշի «Yan» հյութերի խմբաքանակը իրացման կետերից հավաքված չլինի, տնտեսվարողը սխալ մակնշման համար ևս մեկ անգամ կտուգանվի։ Տեղեկությունը Sputnik Արմենիայի հետ զրույցում հայտնեցին Սննդամթերքի անվտանգության տեսչական մարմնից։
Նշենք, որ արդեն քանի օր է` համացանցում տարածվում են տեսանյութեր «Yan» գազավորված հյութերի վերաբերյալ։ Քաղաքացիներն ահազանգում են, որ հյութերի տարաները կրկնակի փաթեթավորում ունեն, և պիտակի տակ թաքնված է ոչ հայրենական արտադրության այլ ապրանքանիշի պիտակ։ Տեսանյութերից հետո սոցցանցային տիրույթում աղմուկ բարձրացավ։ Ոմանք հորդորեցին ՍԱՏՄ-ին անմիջապես զբաղվել խնդրով։
Սննդամթերքի անվտանգության տեսչական մարմնից Sputnik Արմենիային հայտնեցին, որ մինչև քաղաքացիների ահազանգն արդեն տեղյակ են եղել խնդրին և տուգանել են տնտեսվարողին սխալ մակնշման համար։
«Տնտեսվարողը պարտավորված է իրացման ցանցից հավաքել հյութերի ողջ խմբաքանակը։ Եթե մինչև շաբաթվա վերջ խմբաքանակը հավաքված չլինի, տնտեսվարողը ևս մեկ անգամ կտուգանվի»,- հայտնեցին տեսչական մարմնից։
Նշենք, որ մակնշման խախտման համար տնտեսվարողը կարող է տուգանվել 50.000-ից մինչև 300.000 դրամ։
«Տնտեսվարողի պարզաբանմամբ` տարաների խնդիր են ունեցել, բայց միևնույն է, պետք է սպասեին, մինչև տարաների խնդիրը լուծվեր։ Սպառողը պարտավոր չէ գուշակել, թե ինչ հյութ է խմում։ Սպառողը պետք է վերցնի հյութը, տեսնի պիտակն ու վստահ լինի, որ օգտագործում է հենց այդ ապրանքը»,- նշեցին ՍԱՏՄ-ից։
Տնտեսվարողը հայտնել է, որ տարաները գնել են, քանի որ էժան են եղել, սակայն ներսում «Yans» ընկերությանը պատկանող հյութերն են, որոնք լիովին անվտանգ են։