ԵՐԵՎԱՆ, 27 հուլիսի – Sputnik. Վանաձորի ընտրված համայնքապետ, «Վարդաշեն» քրեակատարողական հիմնարկում գտնվող Մամիկոն Ասլանյանի առողջական վիճակը կտրուկ վատացել է։
Տեղեկությունը Sputnik Արմենիայի հետ զրույցում հայտնեց փաստաբան Ռուբեն Հակոբյանը։
«Նրան «Վարդաշեն» ՔԿՀ–ից տեղափոխում են քաղաքացիական հիվանդանոց»,– նշեց Հակոբյանը։
Նրա խոսքով` վերջին շրջանում պաշտպանյալը բողոքել է վատ ինքնազգացողությունից, մասնավոտապես բարձր ճնշումից ու սրտի աշխատանքից։
Դեռ պարզ չէ, թե որ հիվանդանոց են տեղափոխում ու ինչ ախտորոշմամբ
Հիշեցնենք` 2021 թվականի դեկտեմբերի 5-ին Վանաձորում ՏԻՄ ընտրություններում առավելագույն ձայներ էր ստացել «Մամիկոն Ասլանյան» դաշինքը: Դաշինքի օգտին քվեարկել էր 12 814 ընտրող (45%): Դեկտեմբերի 17-ին պետք է տեղի ունենար ընտրված ավագանու անդրանիկ նիստն ու համայնքի ղեկավարի ընտրությունը։ Բայց դրանից մեկ օր առաջ Մամիկոն Ասլանյանը ձերբակալվել, ապա կալանավորվել էր։
Նրան մեղադրանք է առաջադրվել պաշտոնեական լիազորությունները չարաշահելու, պաշտոնեական լիազորություններն անցնելու, պաշտոնեական կեղծիքի հատկանիշներով։
Մամիկոն Ասլանյանն իրեն առաջադրված մեղադրանքը չի ընդունում, փաստաբաններն էլ պնդում են՝ նրա նկատմամբ քաղաքական հետապնդում է իրականացվում։