ԵՐԵՎԱՆ, 27 հուլիսի – Sputnik. Եվրոպական դիվանագիտության ղեկավար Ժոզեպ Բորելը դժգոհել է, որ ինքն ավելի քիչ հայտնի է արևմտյան մամուլում, քան ՌԴ արտգործնախարար Սերգեյ Լավրովը, հայտնում է ՌԻԱ Նովոստին։
«Լավրովն Աֆրիկա է մեկնում` աֆրիկացիներին համոզելու, որ տեղի ունեցող իրադարձությունների ողջ մեղավորը եվրոպական պատժամիջոցներն են, և ամբողջ արևմտյան մամուլը դա կրկնում է։ Ես գնում եմ Աֆրիկա, որպեսզի հակառակն ասեմ, որ պատժամիջոցները կապ չունեն, և ոչ ոք այդ մասին չի գրում»,- հայտարարել է Բորելը Cadena SER ռադիոկայանին տված հարցազրույցում։
Նա նշել է, որ «թշնամուն լսելու» միտում կա։ Բորելը նաև հորդորել է կրկնապատկել ռուսական տեղեկատվության տարածմանը հակազդելու ջանքերը. տեղեկատվություն, որն ինքը «սուտ» է համարում։
Մարտի 2-ին ԵՄ-ն Ուկրաինայում ՌԴ ռազմական հատուկ գործողությունների համապատկերում արգելեց RT-ի և Sputnik-ի ազդանշանների և կոնտենտի տարածումը։ Որոշումը հրապարակվել է ԵՄ-ի պաշտոնական ամսագրում։ Մասնավորապես, որոշման հավելվածում հետևյալ կազմակերպություններն են թվարկվում` RT-Russia Today English, RT-Russia Today UK, RT-Russia Today Germany, RT-Russia Today France և RT-Russia Today Spanish, ինչպես նաև Sputnik-ը` առանց մանրամասների։ Բացի այդ, ԵՄ-ն դադարեցրել է իր տարածքում ռուսական երեք պետական հեռուստաալիքների հեռարձակումը` Россия РТР/РТР Планета, Россия 24 и ТВ Центр-Международный.
ՌԴ արտգործնախարար Սերգեյ Լավրովն ավելի վաղ հայտարարել է, որ Մոսկվան չէր սպասում, որ Արևմուտքը պատժամիջոցներ կկիրառի լրագրողների, մարզիկների, մշակութային գործիչների նկատմամբ։ ՌԴ նախագահին կից մարդու իրավունքների խորհրդի ղեկավար Վալերի Ֆադեևը դիմում է ներկայացրել ԶԼՄ-ների ազատության հարցերով զբաղվող ԵԱՀԿ ներկայացուցիչ Թերեզա Ռիբեյրային և ռուսալեզու պարբերականների վրա գործադրվող ճնշումների պատճառով հորդորել նրան քայլեր ձեռնարկել մամուլի ազատությանն առնչվող նորմերի պահպանման համար։