ԵՐԵՎԱՆ, 26 հուլիսի – Sputnik. Ոստիկանության անձնագրային և վիզաների վարչությունը շարունակում է աշխատել գերծանրաբեռնված ռեժիմով՝ մեծ հերթերի պայմաններում։ Նման տեղեկություն է տարածել ՀՀ ոստիկանությունը` արված աշխատանքի թվային տվյալներ ներկայացնելով։
Նշենք, որ սոցցանցերում բազմաթիվ քաղաքացիներ բողոքում են անձնագրային բաժինների կուտակումներից և մեծ հերթերից։ Քաղաքացիները նշում են, որ առավոտյան ժամը 9-ին կտրոն էին վերցնում և տեսնում, որ արդեն 150 անձ կա հերթագրված։
«Այս տարվա հունիսի 1-ից մինչև հուլիսի 19-ը ընկած ժամանակահատվածում նախորդ տարվա համեմատ կատարվել է շուրջ 131 530 գործարք ավելի կամ այդքան անձ ավել է սպասարկվել ու գտնվել հերթում»,–ասված է հաղորդագրության մեջ։
Նշենք, որ ոստիկանության ներկայացրած տվյալները փաստում են այն մասին, որ վերջին մեկուկես ամսում կատարված գործարքները նախորդ տարվա նույն ժամանակահատվածի համեմատ, զգալիորեն շատ են.
Գործողության տեսակը | 01.06.2021-19.07.2021 | 01.06.2022-19.07.2022 | Տարբերություն |
Հին նմուշի անձնագիր | 69446 | 81707 | +12261 |
Նույնականացման քարտ | 11099 | 32745 | +21646 |
Կենսաչափական անձնագիր | 1544 | 3501 | +1957 |
Օտարերկրյա պետությունում վավերականացման ժամկետի նշում | 65765 | 75183 | +9418 |
Հաշվառում | 28635 | 35354 | +6719 |
ՀԾՀ | 28638 | 105599 | +76961 |
ՀՀ քաղաքացիություն ստանալու համար դիմում | 1191 | 3759 | +2568 |
Ընդամենը | 206318 | 337848 | +131.530 |
Ոստիկանությունը հորդորում է անձնագիր ստանալու, դրանում օտարերկրյա պետություններում վավերականության ժամկետի նշումներ կատարելու գործողությունները իրականացնել նախապես և ըստ անհրաժեշտության, անձնագրային ծառայություններում տեղադրված հերթերը կանոնակարգող սարքավորումներից չստանալ մեկից ավելի կտրոններ։