ԵՐԵՎԱՆ, 25 հուլիսի – Sputnik. Հուլիսի 31-ից ուժի մեջ կմտնի մրցակցության պաշտպանության հանձնաժողովի նախաձեռնությամբ ընդունված ակցիաների, այդ թվում՝ զեղչերի իրականացման ոլորտը կարգավորող «Առևտրի և ծառայությունների մասին օրենքում լրացումներ կատարելու մասին» օրենքը, տեղեկանում ենք ՄՊՀ-ից։
Դրանով սահմանվում են «ակցիա» հասկացությունը և դրա տեսակները, ինչպես նաև «զեղչ» հասկացությունը և կիրառման պայմանները։
«Կարևոր է ընդգծել նաև, որ «Առևտրի և ծառայությունների մասին» օրենքով սահմանված պահանջներին չհամապատասխանող ակցիայի իրականացումը կարող է հանգեցնել անբարեխիղճ մրցակցության։ Այդ դեպքում մրցակցության պաշտպանության հանձնաժողովը կարող է նշանակել տուգանք տնտեսավարող սուբյեկտի՝ տվյալ իրավախախտմանը նախորդող տարվա հասույթի մինչև հինգ տոկոսի չափով»,- ասված է հաղորդագրության մեջ։
Հիշեցնենք, որ ըստ նախագծի` տնտեսվարողը պարտավոր է զեղչի մասին հստակ տեղեկացնել` նշելով ոչ միայն նվազման տոկոսային արտահայտությունը, այլև մինչ այդ գործող գինը, հակառակ դեպքում, գնի իջեցումը զեղչ կամ ակցիա չի համարվում։ Զեղչը չի կարող գործել 3 ամսից ավելի:
Բացի այդ, տնտեսվարողը պարտավոր է ակցիայի ու գնային տարբերությունների մասին տեղեկությունը հրապարակել ակցիային նախորդող 1 ամսվա ընթացքում և այն պահպանել ակցիայի ողջ ընթացքում։ Ակցիայի շրջանակում տնտեսվարողն օրենքով իրավունք կունենա առաջարկվող գնի դիմաց լրացուցիչ ապրանք, ծառայություն, փաթեթ առաջարկել, որի ընդհանուր գինն ավելի ցածր է, քան դրա առանձին բաղադրիչների գների հանրագումարը: