ԵՐԵՎԱՆ, 25 հուլիսի – Sputnik. «Հյուսիսային հոսքի» ևս մեկ տուրբինի կանգնեցման մասին հաղորդագրության ֆոնին Եվրոպայում գազի բորսային գները կտրուկ աճել են, գրեթե մինչև 10 տոկոս, դրանք գերազանցում են հազար խորանարդ մետրի դիմաց 1850 դոլարը, հաղորդում է ՌԻԱ Նովոստին՝ հղում անելով Լոնդոնի ICE բորսայի տվյալներին:
Օգոստոսին գազի մատակարարման ֆյուչերսային պայմանագրերը երկուշաբթի օրվա առևտրային սեսիան բացել են հազար խորանարդ մետրի դիմաց 1680 դոլարի նշագծին մոտ (-0,5 տոկոս ուրբաթ օրվա հաշվարկային գնի՝ 1686 դոլար, նկատմամբ) և աճուրդի առաջին ժամերի ընթացքում չափավոր աճ են գրանցել՝ միջինը 3-4 տոկոսով: Մոսկվայի ժամանակով 14։30-ից հետո գնանշումներն արագացրել են աճի տեմպերը գրեթե մինչև 1800 դոլար (+6,6%), ինչից հետո տևական ժամանակ աճուրդն ընթացել է 1780 դոլար-ի սահմանում (+5,4%)։
Այնուհետև «Գազպրոմը» հայտնել է, որ դադարեցնում է Siemens-ի ևս մեկ տուրբինի շահագործումը, ուստի հուլիսի 27-ից «Հյուսիսային հոսքով» մատակարարումները կլինեն օրական 33 միլիոն խմ-ից ոչ ավելի, այսինքն՝ մայրուղու հզորության 20 տոկոսը: Դրանից հետո գազի գնանշումները կտրուկ ուժեղացրին աճի տեմպերը, Մոսկվայի ժամանակով 17։28-ին հասնելով առավելագույն՝ 1851 դոլար արժեքի (+9.6%): Այս պահին այդ նիշից մի փոքր ցածր են, աճում է մոտ 8%-ով:
Հուլիսին եվրոպական բորսայում գազի հաշվարկային գինը կազմում է հազար խորանարդ մետրի դիմաց միջինը գրեթե 1735 դոլար: Սա մի քանի անգամ բարձր է նախորդ տարվա նույն ժամանակահատվածի ցուցանիշներից։
Գազային գնանշումները պատմական առավելագույն ցուցանիշը թարմացրել են չորս ամիս առաջ՝ ռուսական էներգառեսուրսների արգելման մտավախությունների պատճառով։ Հազար խորանարդ մետրի դիմաց 3892 դոլարի գնային ռեկորդը սահմանվել էր մարտի 7-ին, իսկ հաշվարկային գինը օրվա արդյունքներով կազմել էր 2560,7 դոլար: Այսպիսի կայուն բարձր գներ չեն եղել Եվրոպայում գազային հաբերի ողջ պատմության ընթացքում՝ 1996 թվականից ի վեր։