ԵՐԵՎԱՆ, 24 հուլիսի – Sputnik. Ռուսաստանը Ուկրաինայի հետ հարցերի ավելի լայն շրջանակի շուրջ բանակցությունները վերսկսելու հարցում նախապաշարմունք չունի, ուստի ընտրությունը Կիևինն է։ Եգիպտոսի արտգործնախարար Սամեհ Շուքրիի հետ բանակցություններից հետո հայտարարել է ՌԴ ԱԳ նախարար Սերգեյ Լավրովը։
«Մենք չունենք որևէ նախապաշարմունք՝ վերսկսելու բանակցությունները հարցերի լայն շրջանակի վերաբերյալ, բայց դա մեզանից չէ կախված, քանի որ Ուկրաինայի իշխանությունները՝ նախագահից մինչև անթիվ խորհրդականներ, անընդհատ ասում են, որ բանակցություններ չեն լինի, քանի դեռ Ուկրաինան չի հաղթել Ռուսաստանին»,- լրագրողներին ասել է Լավրովը։
Ռուս-ուկրաինական բանակցությունները ընթանում են փետրվարի 28-ից։ Մոսկվայի պատվիրակությունը գլխավորում է ՌԴ նախագահի օգնական Վլադիմիր Մեդինսկին։ Բելառուսում մի քանի հանդիպումներ են տեղի ունեցել, ապա կողմերը շարունակել են շփվել տեսակապի միջոցով։
Մարտի 29-ին Ստամբուլում անցկացվեց ռուս-ուկրաինական բանակցությունների հերթական փուլը։ Ապրիլի 12-ին ՌԴ նախագահ Վլադիմիր Պուտինը լրագրողներին ասել էր, որ Կիևը հեռացել է Թուրքիայում տեղի ունեցած բանակցություններում ձեռք բերված պայմանավորվածություններից և գործընթացը փակուղի է մտցրել։
Ապրիլի 20-ին ՌԴ նախագահի մամուլի քարտուղար Դմիտրի Պեսկովը հայտնել էր, որ Մոսկվան Կիևին է փոխանցել հստակ ձևակերպված համաձայնագրերի մասին փաստաթղթի նախագիծը և սպասում է պատասխանի։