Հայաստանում ջրի ծավալների խնդիր չկա, խնդիրն այդ ռեսուրսների խելացի, հմուտ ու մասնագիտորեն կառավարումն է։ Sputnik Արմենիայի եթերում նման կարծիք հայտնեց ջրային ոլորտի փորձագետ Քնարիկ Հովհաննիսյանը՝ անդրադառնալով վերջին շրջանում Հայաստանում ջրամատակարարման վերաբերյալ հնչող բողոքներին։
«Մենք ջրի ռեսուրսների խնդիր կունենանք, եթե այսպես շարունակենք վարվել ու չմտածենք, թե ինչպես բաշխել թե՛ ոռոգման, թե՛ խմելու ջուրը»,- ասաց Հովհաննիսյանը։
Փորձագետը բացատրեց՝ քանի որ Հայաստանը լեռնային երկիր է, ունենք գետերի գարնանային հոսքը կառավարող 70-ից ավել ջրամբար։ Հիմնական խնդիրը հենց այս ջրամբարների հետ է կապված։ Դրանք, Հովհաննիսյանի տվյալներով, վնասված են, սարքին չեն ու ունեն տարբեր խոռոչներ ու անցքեր, որոնց միջոցով ջուրը գնում է անհայտ ճանապարհով։
«Ջրամբարներն այդ գարնանային հոսքը պահելու նպատակով են ստեղծվում, որ հետագայում ջուրն օգտագործվի։ Հոսքը կորչում է, անգամ դժվար է հասկանալ, թե ուր է գնում, հավանական է, որ գնում է մեր հարևանների մոտ։ Հենց այդ պատճառով է, որ մենք ունենք ոռոգման ջրի խնդիր։ Ոռոգման ջրի խնդիրը կառավարման և կառույցները սարքին պահելու մեջ է»,- նշեց նա։
Հիշեցնենք, որ վերջին շրջանում Հայաստանի տարբեր մարզերից բողոքներ են հնչում ջրամատակարարման վերաբերյալ։ ՀՀ ՄԻՊ-ն օրեր առաջ հայտնել էր, որ ՀՀ Սյունիքի մարզի Գորիս քաղաքում, Տեղ, Կոռնիձոր, Արավուս և Քարաշեն գյուղերում պատշաճ ջրամատակարարում չի իրականացվում։ Մասնավորապես, կան թաղամասեր, որտեղ խմելու ջուր մատակարարվում է 2-3 օրը մեկ հաճախականությամբ։
Ավելի վաղ Շիրակի մարզի Ղարիբջանյան և Գետք գյուղերի բնակիչները բողոքի ակցիա էին իրականացրել ու փակել էին Գյումրի–Արմավիր ավտոճանապարհը՝ պահանջով, որ իրենց ոռոգման ջրի խնդիրը լուծվի։
Նույն խնդրով Արմավիրի մարզի Ակնալիճ գյուղի բնակիչներն օրեր առաջ փակել էին մարզի գլխավոր ճանապարհը՝ նշելով, որ իրենց այգիներն ամիսներ շարունակ չեն ոռոգվում։