ԵՐԵՎԱՆ, 23 հուլիսի – Sputnik. Անկարայում Շվեդիայի գործերի ժամանակավոր հավատարմատարը կանչվել է Թուրքիայի ԱԳՆ Գյոթեբորգ քաղաքում «Քրդստանի աշխատավորական կուսակցության (ՔԱԿ) կողմնակիցների սադրանքի» կապակցությամբ: Տեղեկությունը ՌԻԱ Նովոստիին է հայտնել դիվանագիտական աղբյուրը:
«Իմանալով Գյոթեբորգում ՔԱԿ կողմնակիցների կողմից իրականացվող ահաբեկչական քարոզչության մասին՝ Անկարայում Շվեդիայի դեսպանատան գործերի ժամանակավոր հավատարմատարը կանչվել է արտաքին գործերի նախարարություն։ Այդ համատեքստում ընդգծվել են այն սպասումները, որ մեղավորները կպարզվեն, կձեռնարկվեն անհրաժեշտ իրավաբանական և դատական միջոցներ, ինչպես նաև կոնկրետ քայլեր՝ Մադրիդում ստորագրված «եռակի հուշագրում» ամրագրված պարտավորությունների լույսի ներքո»,- ասել է գործակալության զրուցակիցը։
ԶԼՄ-ները հայտնում են, որ ՔԱԿ-ի կողմնակիցները հանրահավաք են անցկացրել Գյոթեբորգում՝ բողոքելով Ստոկհոլմի և Անկարայի միջև համաձայնագրերի ստորագրման դեմ:
Հիշեցնենք` ՆԱՏՕ–ի երկրների առաջնորդները հունիսի 29-ին կայացած գագաթնաժողովում Շվեդիային և Ֆինլանդիային պաշտոնապես հրավիրեցին դաշինքին անդամակցելու։ Դա հնարավոր դարձավ Թուրքիայի հետ բանակցությունների մի քանի փուլից հետո, երբ Անկարան վերացրեց իր առարկությունները։ Երկրները պայմանավորվեցին խորացնել համագործակցությունն ահաբեկչության դեմ պայքարում, պարտավորվեցին չաջակցել Քրդստանի աշխատավորական կուսակցությանն (ՔԱԿ) ու իսլամական քարոզիչ Ֆեթուլլահ Գյուլենի կազմակերպությանը (FETO)։
Բացի այդ, ՆԱՏՕ–ի երկրների առաջնորդները մադրիդյան գագաթնաժողովում հաստատեցին դաշինքի նոր ռազմավարական հայեցակարգը, որում Ռուսաստանը ճանաչվեց անվտանգության «ամենաէական և անմիջական սպառնալիք»։ ՌԴ անվտանգության խորհրդի քարտուղար Նիկոլայ Պատրուշևը հայտարարեց, որ Ռուսաստանին թշնամի հայտարարելու որոշումը Եվրոպայում կհանգեցնի լարվածության սրացման ու անվտանգության ապակայունացման և հակասում է Ռուսաստան–ՆԱՏՕ հիմնարար ակտին։