ԵՐԵՎԱՆ, 22 հուլիսի – Sputnik. Ռուսականապրանքների մատակարարման սահմանափակումների վերացման և ուկրաինական հացահատիկի արտահանմանը Մոսկվայի աջակցության մասին համաձայնագրի արարողության ժամանակ Թուրքիայի նախագահ Ռեջեփ Թայիփ Էրդողանը հայտարարել է, որ Ուկրաինայի հակամարտությունը բանակցային սեղանի շուրջ կավարտվի։
«Չնայած մարտադաշտում տիրող իրավիճակին, հակամարտությունը բանակցային սեղանի շուրջ կավարտվի», - ասել է Էրդողանը: Հույս հայտնելով, որ Ուկրաինայում շուտով խաղաղություն կհաստատվի, Էրդողանն ավելացրել է, որ «այստեղ պարտվողներ չեն լինի»:
Նա պատմական է անվանել Ստամբուլում պարենի հարցով հանդիպումը։ Թուրքիայի նախագահը վստահ է, որ Անկարայի, Մոսկվայի, Կիևի ու ՄԱԿ-ի միջև համաձայնագիրը կկանխի աշխարհում սովի վտանգը:
Հայտնել ենք, որ Ստամբուլում այսօր Ռուսաստանի, Ուկրաինայի, Թուրքիայի և ՄԱԿ-ի մասնակցությամբ ստորագրվեց Սև ծովի ափերից միջազգային շուկա հացահատիկի արտահանման վերաբերյալ համաձայնագիրը։
Հիշեցնենք, որ փաստաթղթով նախատեսվում է հացահատիկի արտահանման համար անվտանգության միջանցք ստեղծել։ Այդ է պատճառը, որ փաստաթուղթը ստորագրում են պաշտպանության նախարարները։ Այդ միջանցքով հացահատիկով բեռնված նավերը պետք է դուրս գան նավահանգիստներից և, անցնելով Բոսֆորի ու Դարդանելի նեղուցները, սահմանված ուղով մեկնեն համապատասխան երկրներ։ Նախատեսվում է, որ գործընթացի համակարգման համար Ստամբուլում կստեղծվի համապատասխան կենտրոն։ Նավերը Թուրքիայի կողմից սահմանված կետերում կանգնեցվելու և ստուգվելու են։ Դրանց մասնակցություն է ունենալու նաև ռուսական կողմը։
ՄԱԿ-ում բազմիցս հայտարարել են, որ հացահատիկի պակասի պատճառով պարենային ճգնաժամի սպառնալիք է հասունացել, Արևմուտքը Ռուսաստանին է մեղադրում ուկրաինական հացահատիկի մատակարարումները խոչընդոտելու համար։ Մոսկվան կտրականապես հերքում է մեղադրանքները։