ԵՐԵՎԱՆ, 22 հուլիսի – Sputnik. ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ, «Պատիվ ունեմ» խմբակցության պատգամավոր Թագուհի Թովմասյանը հայտարարել է, որ չի մասնակցի այսօր ՀՀ Ազգային ժողովի խորհրդի նիստին, որտեղ ընդդիմադիր պատգամավորների լիազորությունները դադարեցնելու հարցով Սահմանադրական դատարան դիմելու օրակարգն է քննարկվելու։
«Այսօրվա ԱԺ խորհրդի նիստը, իմ խորին համոզմամբ, քաղաքական վրեժխնդրության կոնկրետ դրսևորում է, որը Նիկոլ Փաշինյանը ցուցաբերում է իր հրաժարականը պահանջողների նկատմամբ»,- Ֆեյսբուքի իր էջում գրել է Թովմասյանը։
Նրա խոսքով` դա դեմ է ժողովրդավարական չափանիշներին։ Բացի այդ, նրա համոզմամբ, ընդդիմադիր պատգամավորները իրենց ընտրողների պահանջով հանրահավաքային շարժման են մասնակցել խորհրդարանից դուրս՝ պայքարելով հրապարակային դաշտում:
«Այդկերպ ևս նրանք իրականացրել են իրենց պաշտոնեական գործառույթները, և չեն կարող քվեարկություններից բացակայությունների հիմքով պատգամավորներին զրկել մանդատից»,- նշել է նա:
Բայց, Թովմասյանի խոսքով, Ազգային ժողովի ընդդիմադիր պատգամավորները, չնայած ՀՀ ընդդիմադիր քաղաքացիների շահն են սպասարկել, բացակայել են ԱԺ նիստերից ու քվեարկություններից։
«Տեղեկացնում եմ, որ պատգամավորական գործունեությանս ողջ ընթացքում ԱԺ նիստերից բացակայելու հարգելի պատճառ ունենալու դեպքում գրավոր դիմել եմ բոլոր ժամանակների ԱԺ նախագահներին՝ ներկայացնելով բացակայությանս պատճառները»,-նշել է նա։
Թովմասյանն ընդգծել է, որ Ազգային ժողովը իր համար պետական կարևորագույն ինստիտուտ է, և դա է պատճառը, որ իրեն մանդատից զրկելու հարց չի առաջացել. նա չի հատել բացակայությունների թույլատրելի շեմը: