ԵՐԵՎԱՆ, 22 հուլիսի – Sputnik. Նոր գործարաններ կառուցելու ցանկություն ունեցող արտադրական ոլորտի ներդրողները պետությունից աջակցման նոր սխեմա կստանան` ենթակառուցվածք ներդրումների դիմաց։ Այս մասին լրագրողներին է հայտարարել ՀՀ էկոնոմիկայի նախարար Վահան Քերոբյանը։
Նախարարը հավելել է, որ նախագիծն արդեն քննարկվում է միջգերատեսչական մակարդակով և կառավարության առաջիկա նիստերից մեկի ընթացքում պետք է ներկայացվի և ընդունվի։
«Միջգերատեսչական մակարդակով նախագծի վերաբերյալ, կարելի է ասել, սկզբունքային համաձայնություն է ձեռք բերվել, և առաջիկայում մենք կներկայացնենք դրա մանրամասները, այսինքն` ինչ պայմաններով և ինչ ենթակառուցվածք կարող է ստանալ ներդրողը։ Կրկնեմ` խոսքը արտադրական ոլորտի ներդրողների մասին է»,–Sputnik Արմենիայի հարցին ի պատասխան նշեց նախարարը։
Հիշեցնենք, որ ներդրումների ներգրավման ծրագրով էկոնոմիկայի նախարարությունը նախատեսում է ներդրումները հասցնել ՀՆԱ-ի մինչև 25%-ի, այդ թվում օտարերկրյա ներդրումները` մինչև ՀՆԱ–ի 6%–ի (ներկայիս 1,7%–ի փոխարեն)։