ԵՐԵՎԱՆ, 22 հուլիսի – Sputnik. Մեկնարկում է «Խոսող կտավներ» ներառական նախագիծը, որի շնորհիվ տեսողության խանգարում ունեցող անձինք կկարողանան ծանոթանալ բարձր արվեստի գործերին։
Քանի որ ցանկացած թանգարանում արգելված է դիպչել ցուցանմուշներին, իսկ տեսողության խանգարում ունեցող անձինք շոշափելով են կարողանում աշխարհը ճանաչել, ուստի ստեղծվում են հանրահայտ կտավների շոշափելի կրկնօրինակներ։
«Սարեր» մշակութային հասարակական կազմակերպության «Խոսող կտավներ» ծրագրի շրջանակում ստեղծվել են Հայաստանի ազգային պատկերասրահի հավաքածուից 5 գլուխգործոցի շոշափելի կրկնօրինակներ` անհայտ հայ նկարչի «Սևանի Աստվածամայր հրաշագործ սրբապատկեր», Մարտիրոս Սարյանի «Հայաստան», Գրիգոր Խանջյանի «Հացը լեռներում», Մինաս Ավետիսյանի «Խնոցի», Սարգիս Մուրադյանի «Կոմիտաս․ վերջին գիշերը»։
Շոշափելի նկարը կտավի ռելիեֆային պատկերն է, որը պատրաստվում է հիպոալերգեն պլաստիկից։ Շոշափելի պատճենը թույլ է տալիս տեսողության խնդիրներ ունեցող մարդուն զանազանել նկարում պատկերված հերոսների դիմագծերն ու հագուստը, բնապատկերի դետալները։ Յուրաքանչյուր շոշափելի կտավ լրացվում է տիֆլոմեկնաբանություններով և Բրայլի այբուբենով կատարված ցուցանակով։ Հայտնի դերասանների կողմից ձայնագրված մեկնաբանություններում հնչում է կտավի հակիրճ նկարագրությունը։
Շոշափելի նկարները Հայաստանի ազգային պատկերասրահում օգոստոսի 3-ին իրենց տեղը կգրավեն բնօրինակ գլուխգործոցների կողքին։ Նախագիծն իրականացվել է ՀՀ ԿԳՄՍ նախարարության աջակցությամբ։