ԵՐԵՎԱՆ, 22 հուլիսի – Sputnik. ԱՄՆ նախագահ Ջո Բայդենի վարչակազմը հրաժարվում է Ուկրաինային ուղարկել պահանջվող MQ-1C Gray Eagle անօդաչու սարքերը: Այս մասին գրում է Wall Street Journal թերթը:
Պարբերականի տվյալներով` ամերիկյան իշխանությունները մտավախություն ունեն, որ անօդաչու թռչող սարքերը կարող են հայտնվել ՌԴ-ի մոտ։
«Բայդենի վարչակազմը չի ցանկանում հավանություն տալ հարցմանը` վկայակոչելով մի շարք հարցերով մտավախությունը` մարտի դաշտում առաջավոր տեխնոլոգիաների հնարավոր կորստից մինչև ուկրաինացիներին ԱԹՍ-ների հետ աշխատելու անհրաժեշտության խնդիրը»,- նշված է հրապարակման մեջ։
Թերթի տեղեկություններով` Ուկրաինան այդ ԱԹՍ-ները խնդրել է ավելի քան 2 ամիս առաջ։
Ռուսաստանն ավելի վաղ ՆԱՏՕ-ի երկրներին բողոքի նոտա է հղել Ուկրաինային ռազմամթերք մատակարարելու համար։ ՌԴ ԱԳ նախարար Սերգեյ Լավրովը նշել է, որ ցանկացած բեռ, որն Ուկրաինայի համար ռազմամթերք կպարունակի, Ռուսաստանի համար օրինական թիրախ կդառնա։ ՌԴ արտաքին քաղաքական գերատեսչությունում հայտարարել են, որ ՆԱՏՕ-ի երկրները կրակի հետ են խաղում` Ուկրաինային ռազմամթերք մատակարարելով։ ՌԴ նախագահի մամուլի խոսնակ Դմիտրի Պեսկովն ընդգծել է, որ Արևմուտքի կողմից Ուկրաինային զենքի տրամադրումը չի նպաստում ռուս-ուկրաինական բանակցությունների հաջողությանը և բացասական ազդեցություն է թողնում։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ուկրաինայում մարտական գործողություններն ընթանում են արդեն 149-րդ օրը։