ԵՐԵՎԱՆ, 21 հուլիսի – Sputnik. Կոնֆերենցիաների լիգայի որակավորման երկրորդ փուլում «Արարատ-Արմենիա»–«Պայդե» դիմակայության ելքը վճռվելու էր Էստոնիայում, անկախ նրանից, թե այսօր ինչ հաշիվ կգրանցվեր։ Երևանում կայացած հանդիպումից հետո այս հայտարարությունն է արել թիմի գլխավոր մարզիչ Վարդան Բիչախչյանը։
«Ուսումնասիրել էինք մրցակցին, գիտեինք, որ խաղում է պաշտպանությունից, փորձում արագ հակագրոհներով արդյունքի հասնել։ Կարծում եմ՝ առաջին 10 րոպեում ինքնավստահության պակաս կար, ինչի հետևանքով սխալվեցինք, բայց հետո մտանք խաղի մեջ։ Այսօր ինչ հաշիվ էլ գրանցվեր, դիմակայության ելքը վճռվելու էր Էստոնիայում։ Շանսերը գնահատում եմ 50-50: Պատճառաբանություններ չեմ սիրում, բայց քամին այսօր խանգարեց, թույլ չտվեց օգտագործել մեր մշակած կոմբինացիաները»,– նշել է նա։
Հիշեցնենք` Կոնֆերենցիաների լիգայի որակավորման երկրորդ փուլի առաջին խաղում «Արարատ-Արմենիան» Երևանում 0։0 հաշվով ավարտեց հանդիպումը էստոնական «Պայդե» թիմի հետ։
«Արարատ-Արմենիան» պատասխան հանդիպումը Էստոնիայում կանցկացնի ուղիղ մեկ շաբաթից։ Հուլիսի 28-ին կայանալիք դիմակայության հաղթողը Կոնֆերենցիաների լիգայի որակավորման երրորդ փուլում կմրցի բելգիական «Անդերլեխտի» հետ։