ԵՐԵՎԱՆ, 21 հուլիսի – Sputnik. Բելառուսի նախագահ Ալեքսանդր Լուկաշենկոն հայտարարել է, որ Ռուսաստանի նախագահ Վլադիմիր Պուտինը որևէ համասլավոնական պետության մասին չի երազում։
«Այդ ես էի երազում սլավոնական պետության մասին։ Նրանք ժամանակին ռուսական աշխարհի գաղափարն էին առաջ մղում։ Այդ ես էի 90-ականներից ասում, որ սլավոնական պետություններ կան», – «Ֆրանս Պրեսս» գործակալությանը տված հարցազրույցում ասել է Լուկաշենկոն։
Բելառուսի առաջնորդի խոսքով` ինքն այդ պետության մեջ տեսնում էր լեհերին, սլովակներին, բուլղարացիներին և այլն։
«Մենք չպետք է կորցնենք այդ կապը։ Այո՛, յուրաքանչյուրն ապրում է իր պետությունում։ Բայց մենք սլավոններ ենք։ Ես եմ այդ մասին խոսել։ Այնպես որ Պուտինը որևէ համասլավոնական պետության մասին չի խոսել և չի երազել։ Դա արդեն դուք եք հորինել», – ասել է նա լրագրողին։
Հարցին, թե որքան ժամանակ է պատրաստվում մնալ նախագահի պաշտոնում, Լուկաշենկոն պատասխանել է, որ դա ոչ թե ինքն է որոշում, այլ Բելառուսի ժողովուրդը։