ՀՀ ՊՆ պատվիրակությունը զենք գնելու հարցեր է քննարկել Հնդկաստանում. ԶԼՄ

ԵՐԵՎԱՆ, 21 հուլիսի – Sputnik. ՀՀ ՊՆ ներկայացուցիչները հունիսին Հնդկաստան են այցելել, որտեղ քննարկել են Հայաստան սպառազինություն մատակարարելու հնարավորությունը։ Այս մասին գրում է «The Sentinel» հնդկական պարբերականը` նշելով, որ հայ գործընկերները ներկայացրել են այն զենքերի ցանկը, որոնք ուզում են ձեռք բերել։

Ավելին` ՀՀ ՊՆ ներկայացուցիչներից մեկն անանուն մնալու պայմանով ասել է պարբերականին, որ 44-օրյա պատերազմը Հայաստանին ստիպել է վերաիմաստավորել իր ռազմական կարիքները։

Հոդվածում ասվում է, որ Հայաստանն ու Հնդկաստանը քաղաքակրթական, պատմական կապեր ունեն, որոնք նոր շունչ են ստացել 2019 թվականի սեպտեմբերին ՄԱԿ-ի ԳՎ-ի նստաշրջանի շրջանակում երկու երկրների վարչապետների հանդիպումից հետո։

«Հնդկաստանը Հայաստանին դիտարկում է ոչ միայն որպես բարեկամ երկիր, այլև որպես լավ հակակշիռ Թուրքիային, որի նախագահ Ռեջեփ Թայիփ Էրդողանը մշտապես բավական մարտական տրամադրվածություն է ունեցել Քաշմիրի հարցում և թշնամական քաղաքականություն է վարել Հնդկաստանի նկատմամբ։ Նույնը վերաբերում է Ադրբեջանին, որը սերտորեն կապված է Թուրքիայի և Պակիստանի հետ։ Հայաստանը ռազմավարական տեսանկյունից գտնվում է Ռուսաստանի, Իրանի և Թուրքիայի հետ սահմանին։ Դա մուլտիմոդալ առևտրային ճանապարհների զգալի մասն է»,- ասվում է հոդվածում։

Հեղինակի կարծիքով` Հայաստանի հետ ռազմական համագործակցությունը, առևտուր ու ներդրումներ անելը կարող են ռազմավարական գործընկերության հիմք դառնալ։ Ավելին` Հնդկաստանը կարող է հզորություններ ստեղծել համատեղ արտադրության համար։

Հրապարակման մեջ նշվում է նաև, որ Հայաստանի և Ռուսաստանի սերտ հարաբերությունները լրացուցիչ առավելություն են Հնդկաստանի համար։ Հեղինակը չի մանրամասնում, բայց ինչպես հայտնի է, Հնդկաստանը, որը վերջին տարիներին հաջողությունների է հասել սեփական ՌԱՀ-ի զարգացման հարցում, ավանդաբար շարունակում է մնալ ռուսական զենքի և զինտեխնիկայի խոշորագույն ներկրողներից մեկը։