Հուլիսի 20-ին աշխարհում նշվում է Շախմատի միջազգային օրը։ Իր արմատներով այն գնում է հեռավոր 1966 թվական։ Հենց այդ ժամանակ են նշել այդ օրն առաջին անգամ, իսկ տոնի հաստատման նախաձեռնությունը Շախմատի միջազգային ֆեդերացիայինն (ՖԻԴԵ) է, որը հիմնադրվել է ավելի վաղ՝1924 թվականին, բայց հենց հուլիսի 20-ին Փարիզում։
Օրը նշվում է աշխարհի ավելի քան 170 երկրում։ Այդ օրը ՖԻԴԵ–ի հովանու ներքո տարբեր թեմատիկ միջոցառումներ, մրցումներ և միաժամանակյա խաղի սեանսներ են անցկացվում։
Ոչ պակաս քան 1.5 հազար տարվա պատմություն ունեցող խաղի կանոնները ձևավորվել են XV դարում, այսօր դրանք հայտնի են որպես «դասական»։ Շախմատում կանոնները վերջնական տեսքի եկան XIX դարում, երբ սկսեցին կանոնավոր կերպով միջազգային մրցումներ անցկացվել։
Մեր օրերում ամենահին և իմաստուն խաղերից մեկը ճանաչված ու սիրված է բոլոր մայրցամաքներում և աշխարհի բոլոր ծայրերում։ Բացառություն չէ նաև Հայաստանը, որտեղ շախ ու մատ են անում գրեթե ամեն քաղաքում, գյուղում, թաղամասում և բակում։ Ամենևին պատահական չէ մեր երկրում հատկապես վերջին տարիներին մի շարք երիտասարդ շախմատիստների հայտնվելը, որոնք պատրաստ են գրավելու շախմատային բարձունքները։
Տարբեր տարիներին և տարբեր երկրներում շախմատի ձեռք բերած իրական հանրաճանաչության մասին` մեր ֆոտոշարքում։