ԵՐԵՎԱՆ, 20 հուլիսի – Sputnik. ՀՀ արտաքին գործերի նախարար Արարատ Միրզոյանը Լեհաստանի Սենատի նախագահ Տոմաշ Գրոձկիին է ներկայացրել Ղարաբաղյան հակամարտության գոտում տիրող իրավիճակը, Արցախյան 44-օրյա պատերազմի հետևանքով առաջացած հումանիտար խնդիրները։ Տեղեկությունը հայտնում է ՀՀ արտաքին գործերի նախարարության մամուլի ծառայությունը։
Նախարարը նաև ներկայացրել է ԼՂ հիմնախնդրի և Ադրբեջանի հետ հարաբերությունների կարգավորման վերաբերյալ հայկական կողմի դիրքորոշումը։
«Հումանիտար խնդիրների համատեքստում Միրզոյանը շեշտել է Ադրբեջանում ապօրինաբար պահվող հայ ռազմագերիների և քաղաքացիական անձանց անհապաղ ազատ արձակման և հայրենադարձման, ինչպես նաև ադրբեջանական վերահսկողության տակ անցած տարածքներում հայկական պատմամշակութային և կրոնական ժառանգության պաշտպանության անհրաժեշտությունը»,- ասված է հաղորդագրությունում:
Նախարարը նշել է, որ Ադրբեջանի առավելապաշտական հռետորաբանությունը խաթարում է տարածաշրջանային կայունության ու խաղաղության հաստատման ջանքերը։
Ընդգծվել է, որ Լեռնային Ղարաբաղի հակամարտությունը պետք է լուծվի խաղաղ ճանապարհով՝ բանակցությունների սեղանի շուրջ:
Տոմաշ Գրոձկին խաղաղության ջանքերին աջակցելու պատրաստակամություն է հայտնել։
Հիշեցնենք` Միրզոյանը հուլիսի 19-ին Վարշավա է մեկնել պաշտոնական այցով։