ԵՐԵՎԱՆ, 18 հուլիսի – Sputnik. Ռուսաստանը կողմ է Իրանի հետ միջուկային համաձայնագրի վերականգնմանը այն պայմաններով, որոնք հաստատվել էին 2015 թվականին ՄԱԿ-ի Անվտանգության խորհրդի բանաձևով։ Այս հայտարարությունն արել է ՌԴ նախագահի օգնական Յուրի Ուշակովը։
«Նպատակն արտաքին աշխարհի հետ Իրանի բնականոն առևտրատնտեսական փոխգործակցության սահմանափակումների վերացումն է: Մոսկվան կշարունակի իր ջանքերն այս ուղղությամբ»,- ասել է Ուշակովը ճեպազրույցում։
Նրա խոսքով՝ Ռուսաստանի նախագահ Վլադիմիր Պուտինը Թեհրան կատարելիք այցի ընթացքում իրանցի գործընկերների հետ հանդիպումների ժամանակ կքննարկի Իրանի միջուկային քայլերի վերաբերյալ Գործողությունների համատեղ համապարփակ ծրագրի շուրջ ստեղծված իրավիճակը։
Հիշեցնենք` 2015 թվականին «վեցյակի» (Մեծ Բրիտանիա, Գերմանիա, Չինաստան, Ռուսաստան, ԱՄՆ, Ֆրանսիա) ու Իրանի կնքած Գործողությունների համատեղ համապարփակ ծրագիրը (ԳՀՀԾ), որը ենթադրում էր պատժամիջոցների վերացում՝ Իրանի միջուկային ծրագրի սահմանափակման դիմաց՝ որպես Թեհրանի կողմից միջուկային զենք չստանալու երաշխիք, երեք տարի էլ չգոյատևեց։ 2018 թվականի մայիսին ԱՄՆ նախագահ Դոնալդ Թրամփը հայտարարեց, որ ԱՄՆ-ն միակողմանի կարգով դուրս է գալիս ծրագրից ու վերականգնում է Թեհրանի դեմ խիստ պատժամիջոցները։ Իրանն էլ հայտարարեց համաձայնագրով ստանձնած իր պարտավորությունների փուլային կրճատման մասին՝ հրաժարվելով միջուկային հետազոտությունների և ուրանի հարստացման մակարդակի սահմանափակումներից։
2021 թվականի դեկտեմբերին կողմերը համաձայնության եկան երկու համաձայնագրերի նախագծերի շուրջ, որոնցում եվրոպական կողմը ներառել էր Իրանի դիրքորոշումները։ Իրանի նախագահի խոսնակ Բաղերի Քանին հայտարարեց, որ բանակցությունները լավ ընթացք ունեն, սակայն ԱՄՆ Պետդեպարտամենտի խոսնակ Նեդ Փրայսն ասաց, որ Վիեննայում մեծ առաջընթաց չի գրանցվել, և Թեհրանին հորդորեց լրջորեն մոտենալ խնդրին։ Մարտ ամսվա վերջին բանակցությունները դադարեցին։ Իրանի ԱԳՆ-ն դրա համար մեղադրում է ԱՄՆ-ի վարչակազմին։