ԵՐԵՎԱՆ, 18 հուլիսի – Sputnik. «Փորձագիտական կենտրոն» ՊՈԱԿ-ին պատկանող 281 միլիոն դրամ արժեքով շինություններն օտարվել են ավելի քան 20 անգամ պակաս գնով, տեղեկությունը հայտնում է դատախազությունը։
Ուսումնասիրվել է պետական գույքի կառավարման վարչության ենթակայության՝ Մասիս քաղաքում գտնվող «Փորձագիտական կենտրոնին» պատկանող 2993.7 քմ մակերեսով շինությունների օտարման գործընթացի համապատասխանությունը օրենսդրությամբ սահմանված պահանջներին:
Արդյունքում պարզվել է, որ գնահատող ընկերությունը 2017թ. իրականացրել է նշված շինությունների գնահատում։ Տրված եզրակացությամբ դրանց արժեքը 12 մլն 997 հազար դրամ է եղել, սակայն այդ եզրակացությունը գլխավոր դատախազությանը չի տրամադրվել այն հիմնավորմամբ, որ այն գույքի օտարման գործից բացակայում է: Պարզվել է, որ ընկերության և պետգույքի կառավարման վարչության միջև գնահատման ծառայությունների մատուցման գործընթացն իրականացվել է առանց ծառայությունների մատուցման պայմանագրի։
«Մրցույթի արդյունքում 2018-ին կնքված պայմանագրով «Փորձագիտական կենտրոնին» պատկանող շինություններն օտարվել են 12 մլն 997 հազար դրամով։ Բայց գնորդը նշված գույքը շուրջ 1 տարի անց վերավաճառել է 37 միլիոն դրամով կամ սկզբնական գնահատման և վաճառքի արժեքից շուրջ 3 անգամ ավելի գնով»,-ասված է հաղորդագրության մեջ։
Կադաստրի կոմիտեի «e-cadastre.am» կայքում առկա տվյալների համաձայն՝ 2022-ի դրությամբ նշված անշարժ գույքի շուկայական արժեքին մոտարկված կադաստրային արժեքը 281 միլիոն դրամ է։
Նկատի ունենալով, որ ուսումնասիրությամբ ի հայտ են բերվել ՀՀ քրեական օրենսգրքով նախատեսված 446-րդ հոդվածի 2-րդ մասով` պաշտոնեական անփութության հատկանիշներով նախատեսված արարքի մասին վկայող տվյալներ՝ ուսումնասիրության արդյունքներն ուղարկվել են Քննչական կոմիտե՝ քրեական վարույթ նախաձեռնելու համար: