ԵՐԵՎԱՆ, 18 հուլիսի – Sputnik. ՀՀ ԱԱԾ-ն ու ԱԳՆ-ն հրաժարվում են մեկնաբանություններ տալ ՀՅԴ Բյուրոյի անդամ, Ֆրանսիայի հայկական կազմակերպությունների համակարգող խորհրդի համանախագահ Մուրադ (Ֆրանկ) Փափազյանի վերաբերյալ։ Sputnik Արմենիան հարցում էր ուղարկել գերատեսչություններին և խնդրել պարզաբանել՝ ինչո՞ւ է Փափազյանին արգելվել մուտք գործել ՀՀ, և ինչո՞ւ է Փափազյանը հանդիսանում Հայաստանի Հանրապետությունում «անցանկալի անձ»։
ԱԳՆ-ն ի պատասխան հարցման նշել է, որ դա իր իրավասություններից դուրս է, ԱԱԾ-ն էլ հրաժարվել է տեղեկություն տրամադրել` անձնական կյանքի գաղտնիության հիմքով։
Հիշեցնենք՝ Մուրադ Փափազյանը Երևան էր ժամանել հուլիսի 13-ի երեկոյան։ «Զվարթնոց» օդանավակայանում արգելել են նրա մուտքը ՀՀ, վերցրել անձնագիրը, ապա ուղեկցել Ֆրանսիա մեկնող ինքնաթիռ։
Մուրադ Փափազյանն այս մասին գրառում էր արել ֆեյսբուքյան իր էջում և նշել, որ դա արվել է վարչապետ Նիկոլ Փաշինյանի անձնական հրամանով։
Ըստ «Դիմադրություն» շարժման՝ Փափազյանին երկիր չթողնելը Թուրքիայի պահանջն է եղել։ Իշխան Սաղաթելյանի խոսքով` քննարկում են հստակ նախապայմաններ, որոնցից են նաև նրանք, որ Հայաստանը ճանաչի Թուրքիայի ներկայիս սահմանները և հրաժարվի Հայոց ցեղասպանության միջազգային ճանաչման գործընթացից։