Շինարարությունն արտահանելի հատված չէ, այդ պատճառով չի կարելի ասել, թե դրա ընդլայնումը բերում է տնտեսության մրցունակության բարձրացմանը։ Բայց մյուս կողմից շինարարության ծավալների ընդլայնումը հնարավորություն է տալիս ներգրավել մեծաքանակ աշխատուժ` լուծելով սոցիալական լուրջ խնդիրներ։ Sputnik Արմենիայի հետ զրույցում, խոսելով շինարարական ծավալների ավելացման մասին, նման կարծիք հայտնեց տնտեսագետ Արմեն Քթոյանը։
«Շինարարության ծավալների աճի վրա ազդել են մի քանի գործոններ։ Նախ` հիփոթեքի դեպքում եկամտահարկի փոխհատուցման կարգավորման որոշ փոփոխություններ են նախատեսված, որոնք 2023 թվականից Երևանում կմտնեն ուժի մեջ»,– մանրամասնեց տնտեսագետը։
Քթոյանի կարծիքով` մյուս գործոնը պայմանավորված է ռուս–ուկրաինական հակամարտության արդյունքում Հայաստան ժամանած օտարերկրյա քաղաքացիների հանգամանքով, որոնց ներկայությունը հանգեցրել է անշարժ գույքի շուկայում գների էական բարձրացման, ինչն իր հերթին մեծացնում է շինարարության ոլորտի նկատմամբ ներդրումային գրավչությունը։
«Պետք է նաև հաշվի առնել պետբյուջեի հաշվին իրականացվող շինարարությունը, առավել ևս, որ հաջորդ տարվա համար նույնպես նախատեսվում է կապիտալ ծախսերի ավելացում, իսկ այս տարվա մայիսին պետբյուջեի հաշվին արվող շինարարությունն արձանագրել է ավելի քան 40 տոկոս աճ։ Այստեղ կա համայնքների և պետության կողմից հատկացված սուբվենցիաների միջոցներով իրականացվող շինարարություն»,– ասաց Քթոյանը։
Նրա խոսքով` չի կարելի ասել, որ ոլորտում առկա 11,4 տոկոս աճն այն ցուցանիշն է, որը կարելի է համարել էական առաջընթաց։ Շինարարության վերաբերյալ տնտեսվարող սուբյեկտներն ունեին որոշակի պլաններ, որոնք կորոնավիրուսի պատճառով չեն իրականացել, և գուցե հիմա է այն հարմար ժամանակահատվածը, որպեսզի առկախված ծրագրերը վերստին կյանքի կոչվեն։
«Շինարարության ոլորտում այսօր աշխատուժի գները նույնպես ցուցաբերում են աճի միտում, ինչը նշանակում է, որ այն աշխատուժը, որը մնաց Հայաստանում, նույնպես նպաստեց աշխատանքների ընդլայնմանը։ Ուստի շինարարության ոլորտը հնարավորություն ունի ոչ միայն կլանելու այդ առաջարկը, այլև լրացուցիչ պահանջարկ ներկայացնելու աշխատուժի նկատմամբ։ Եթե նայենք զուտ քանակային առումով, ապա շինարարությունում զբաղվածների թվաքանակի փոփոխությունը նախորդ տարվա նույն ժամանակահատվածի համեմատ կազմում է 7-8 տոկոս»,– պարզաբանեց տնտեսագետը։
Նշենք, որ վիճակագրական կոմիտեի տվյալներով՝ այս տարվա հինգ ամիսներին Հայաստանում ընթացիկ գներով ավելի քան 112 մլրդ դրամի շինարարություն է կատարվել, ինչի արդյունքում շինարարության ծավալներն աճել են 11.4 տոկոսով։
Ընթացիկ տարվա հինգ ամիսներին Հայաստանում պետական բյուջեի հաշվին իրականացվել է 25.5 մլրդ դրամի շինարարություն։