ԵՐԵՎԱՆ, 12 հուլիսի – Sputnik. Սիսիան-Գորիս ավտոճանապարհին «Nissan March» մակնիշի ավտոմեքենան գլորվել է ու հայտնվել դաշտամիջյան հատվածում, ինչի հետևանքով 2 մարդ տուժել է։ Տեղեկությունը հայտնում է ԱԻՆ մամուլի ծառայությունը։
Նշվում է, որ դեպքի մասին Սյունիքի մարզային ճգնաժամային կառավարման կենտրոնում ահազանգը ստացել են այսօր ժամը 13։14-ին։
Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։
Պարզվել է, որ Մ2 ավտոճանապարհի Սիսիան-Գորիս հատվածի 19-րդ կմ-ում «Nissan March» մակնիշի ավտոմեքենան (վարորդ՝ Ս․ Ա․, ծնված 1998 թ․) դուրս է եկել ճանապարհի երթևեկելի հատվածից (մոտ 6մ), գլորվել և հայտնվել դաշտամիջյան հատվածում:
Մինչ փրկարարների կանչի վայր հասնելը Ս․ Ա․-ն և ուղևոր Հ․ Ա․-ն (ծնված 2003 թ․) հոսպիտալացվել են Սիսիանի ԲԿ, որտեղ բժիշկները Ս․ Ա․-ի առողջական վիճակը գնահատել են ծանր, իսկ Հ․ Ա․-ինը՝ կայուն:
Փրկարարները հոսանքազրկել են ավտոմեքենան և փակել գազի բալոնի փականը: