ԵՐԵՎԱՆ, 11 հուլիսի – Sputnik. ԿԳՄՍ նախարարությունը, ընդունելի համարելով Հիսուս Քրիստոս մոնումենտալ արձանի գաղափարը, միևնույն ժամանակ, պահանջում է դադարեցնել ցանկացած գործունեություն Հատիսի հնավայր-ամրոցի տարածքում, որը հակասում է գործող օրենսդրությանը և կարգերին։ Նման հայտարարությամբ է հանդես եկել ԿԳՄՍՆ–ն` անդրադառնալով արձանի կառուցմանն ու դրա շուրջ շրջանառվող տեղեկություններին։
Նախարարությունը հայտնում է, որ փետրվարի 28-ին «Գագիկ Ծառուկյան» բարեգործական հիմնադրամից ստացել է արձանի տեղադրմանը վերաբերող գրության, ինչին ի պատասխան մարտի 17-ի հիմնադրամին տեղեկացրել է, որ «… նախատեսվող մոնումենտալ քանդակ-համալիրի տեղադիրքը որոշելիս անհրաժեշտ է հաշվի առնել «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքի դրույթները և չտեղադրել այն պատմության և մշակույթի հուշարձանների կամ դրանց պահպանական գոտիների տարածքներում»:
«Վերոնշյալ գրությունից հետո նշյալ հիմնադրամի կողմից ԿԳՄՍ նախարարություն նախագիծ չի ներկայացվել: Միևնույն ժամանակ, ԿԳՄՍՆ ենթակայության «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի մարզային աշխատակիցներն ահազանգել են, որ դեպի Հատիսի գագաթ իրականացվում են ճանապարհի ուղղման և լայնացման աշխատանքներ»,–ասված է հաղորդագրության մեջ։
Նշվում է նաև, որ մասնագետներն այցելել են տարածք, ուսումնասիրություններ կատարել:
Ի դեպ, Հատիսի փեշերին առկա են պատմության և մշակույթի՝ պետական ցուցակում գրանցված շուրջ 20՝ տարբեր դարաշրջաններով թվագրվող հուշարձաններ: Բացի այդ, դեռևս 2019 թ․ հայ-իտալական հնագիտական արշավախմբի ուսումնասիրությունների արդյունքում պարզվել է, որ Հատիս լեռան գագաթին նախնական տվյալներով առկա է բրոնզ-երկաթեդարյան հնավայր-ամրոց նորահայտ օբյեկտ, որի պարիսպները շատ լավ տեսանելի են օդային լուսանկարներից:
Ըստ նախարարության` նշյալ նոր հայտնաբերված հնավայր-ամրոցի տարածքում իրականացվել են հողի լիցքի և հարթեցման աշխատանքներ, և եթե անգամ նորահայտ օբյեկտը դեռ ընդգրկված չէ հուշարձանների պետական ցուցակում, ակնհայտ է, որ այն հնավայր-ամրոց է։ Ուստի, ըստ օրենքի, պարտավոր են դադարեցնել աշխատանքներն այդ հատվածում։
Այսպիսով, ԿԳՄՍՆ–ն հավելում է, որ մինչ սահմանված կարգով նախագծի ներկայացումը և մասնագիտական ուսումնասիրությունը պահանջում է դադարեցնել ցանկացած գործունեություն հնավայր-ամրոցի տարածքում, որը հակասում է գործող օրենսդրությանը և կարգերին։
Հավելենք, որ ԿԳՄՍՆ-ն խմբագրել է իր հաղորդագրությունը, քանի որ ավելի վաղ հայտնել էր, թե մամուլից են իմացել, որ Հատիս լեռն է ընտրվել որպես արձանի տեղադրության վայր։
Հիշեցնենք` Հայաստանում Հիսուսի արձան տեղադրելու մասին Ծառուկյանը տեղեկացրել էր հունվարի 14-ին և ընդգծել` նախագծի իրականացման համար մրցույթ է հայտարարում, որի ընդունման վերջնաժամկետը փետրվարի 20-ն էր։
ԲՀԿ առաջնորդի ցանկությամբ` միայն արձանի բարձրությունը (առանց պատվանդանի) պետք է լինի 33 մետր։
Մարտի 24-ին Հայ առաքելական եկեղեցին հանդես եկավ հայտարարությամբ` Գագիկ Ծառուկյանին հորդորելով զերծ մնալ Հիսուս Քրիստոսի արձանի պատրաստումից։ Նշվում էր, որ նման արձանը հակասում է Հայաստանյայց առաքելական սուրբ եկեղեցու ավանդույթին։ Սակայն եկեղեցու դիրքորոշումը Ծառուկյանին հետ չպահեց իր մտքից, ավելին` նա ի պատասխան 3 հակափաստարկ ներկայացրեց ու շարունակեց նախագծի իրագործումը։
ՀՀ վարչապետ Նիկոլ Փաշինյանը հուլիսի 7-ին կառավարության նիստում հայտարարեց, որ դեմ չեն Հատիս լեռան վրա Հիսուս Քրիստոսի արձանը կանգնեցնելու նախաձեռնությանը: Ավելին` Փաշինյանը պետական կառավարման մարմիններին հանձնարարեց սեղմ ժամկետում ընդունել ենթաօրենսդրական ակտեր, որոնք անհրաժեշտ են նախաձեռնությունը իրականացնելու համար:
Հիսուս Քրիստոսի արձանի կառուցման աշխատանքները մեկնարկել են հուլիսի 9-ին։