ԵՐԵՎԱՆ, 11 հուլիսի – Sputnik. Համաշխարհային շուկաներ ուկրաինական ու ռուսական հացահատիկի մուտքի ապահովման շուրջ քննարկումները շարունակվում են բարձրագույն մակարդակներում: Տեղեկությունը ճեպազրույցի ժամանակ հայտնել է ՄԱԿ-ի գլխավոր քարտուղարի պաշտոնական ներկայացուցչի տեղակալ Ֆարհան Հաքը։
Ավելի վաղ Թուրքիայի նախագահը հեռախոսազրույց էր ունեցել Ռուսաստանի և Ուկրաինայի առաջնորդների հետ, նրանց հետ քննարկել հացահատիկի խնդիրը:
«Քննարկումները շարունակվում են ամենաբարձր մակարդակներում։ Որոշ քննարկումներ անցկացվում են ՄԱԿ-ի գլխավոր քարտուղարի հետ, որոշ քննարկումներ՝ առանցքային առաջնորդների հետ»,- ասել է նա։
ՄԱԿ-ում բազմիցս հայտարարել են հացահատիկի դեֆիցիտի պատճառով պարենային ճգնաժամի սպառնալիքի մասին։ Արևմուտքը մեղադրում է Ռուսաստանին համաշխարհային շուկաներ ուկրաինական հացահատիկի մատակարարումներին հակազդելու մեջ։ Մոսկվան կտրականապես հերքել է նման մեղադրանքները։
ՌԴ նախագահ Վլադիմիր Պուտինը հայտարարել է, որ Ռուսաստանը չի խոչընդոտում Ուկրաինայից հացահատիկի արտահանմանը, եթե Կիևը ականազերծի նավահանգիստները, ցորենով բեռնված նավերը առանց որևէ խնդրի կկարողանան այնտեղից դուրս գալ։