Շրջակա միջավայրի նախարարությունն ինտենսիվորեն զբաղվում է Սևանա լճի ափամերձ տարածքների մաքրմամբ, բայց միջոցառումները պետք է ավելի մեծ ռեսուրսներով ու ծավալներով իրականացվեն, որպեսզի ստացվի ակնկալվող արդյունքը։ Sputnik Արմենիայի հետ զրույցում այս տեսակետը հայտնեց «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրենի տեղակալ Գայանե Շահնազարյանը։
Սևանա լիճը նորից սկսել է ծաղկել: 2022 թվականին` տարեսկզբից սկսած, լիճը բացասական հաշվեկշիռ ունի: Արդեն մեկնարկել է ոռոգման համար ջրառը: Որոշված է Սևանա լճից բաց թողնել մինչև 170 միլիոն խմ ջուր:
«Սևանա լճի ծաղկման համար այսօր կան նպաստավոր պայմաններ, երևույթը նորություն չէ, իսկ պատճառներն ավելի շատ անցյալում են, քան ներկայում, որովհետև երբ ջրային մակերեսի ծաղկման հետ կապված նշաններն ի հայտ եկան, որոշում կայացվեց լճի մակարդակը բարձրացնել»,- ասաց Շահնազարյանը։
Նրա խոսքով` լճի ծաղկման գործընթացին նպաստում են սննդային աղբյուրները, ջրի մակարդակի իջեցումը, արևի ճառագայթները և համապատասխան ջերմաստիճանը, որոնց միաժամանակյա համադրումն էլ դառնում է ծաղկման պատճառ։
«Բնության մեջ բացասական գործընթացները կրկին ելակետային վիճակի բերելու համար անհրաժեշտ է շատ ավելի մեծ էներգիա, և շոշափելի արդյունքը կարող է տեսանելի լինել տարիներ անց, բայց ոչ այս պահին, որովհետև միջոցառումներն ունեն ազդեցության ժամկետներ»,- նշեց Շահնազարյանը։
Ըստ նրա` Սևանա լճում ձկան պաշարների ավելացման խնդիրը ևս ջրի որակի լավացման քայլերից մեկն է, քանի որ ձկները յուրացնում են ազոտային, ֆոսֆորային պաշարները, ըստ էության կատարում են սանիտարական աշխատանք։
«Հետևաբար, 2014 թվականից սկսած ու դրան նախորդած տարիներին ձկնային պաշարները պարբերաբար համալրվում էին։ Այս տարի բավական մեծ քանակությամբ իշխան ձուկ է լցվել Սևանա լիճ»,- տեղեկացրեց Շահնազարյանը։
Նա հույս հայտնեց, որ ձկնային պաշարների վերականգնումը նույնպես որոշ ժամանակ հետո դրական ազդեցություն կունենա լճի էկոհամակարգի վրա։
Հիշեցնենք, Հիդրոօդերևութաբանության և մոնիթորինգի կենտրոնն այսօր հայտնել էր, որ Սևանա լճի մակարդակը հուլիսի 4-10-ն ընկած ժամանակահատվածում իջել է 3 սմ-ով և կազմել 1900.7 մ (10.07.22թ.), ինչը անցյալ տարվա նույն օրվա մակարդակից ցածր է 5 սմ-ով։