ԵՐԵՎԱՆ, 11 հուլիսի – Sputnik. Այս տարի առաջին դասարանցիների հայտագրումը ռուսական ուսուցմամբ դասարաններ կմեկնարկի առանձին կայքով։ Տեղեկությունը լրագրողների հետ հրավիրված ասուլիսում հայտնեց Կրթական տեխնոլոգիաների ազգային կենտրոնի տնօրեն Արտակ Պողոսյանը։
Նշենք, որ այս տարի առաջին դասարանցիների հայտագրումը դպրոցներ 3 փուլով սկսվել է հունիսի 21-ին։ Եթե նախորդ տարի ծնողները մեկ նշումով ընտրում էին հայկական կամ ռուսական ուսուցմամբ դասարան և երբեմն շփոթում էին, ապա այս տարի կայքերն առանձնացվել են։
«Երկու փուլն ավարտվել է, իսկ երրորդ փուլի համար վաղը` հուլիսի 12–ին, ժամը 9–ին կբացվի haytru.emis.am կայքը, որը նախատեսված է օտարերկրյա քաղաքացիների, օտարազգի այն ծնողների համար, որոնք ցանկանում են իրենց երեխաներին ընդունել ռուսերենով ուսուցման դասարաններ»,–ասաց Գևորգյանը։
Նրա խոսքով` այս տարի համակարգը որևէ տեխնիկական կամ ծրագրային խնդիր չի ունեցել։ Ծնողների կողմից գրեթե դժգոհություններ չկան։
«Այս պահին ունենք հայտագրված շուրջ 21.000 երեխա։ Կանխատեսվում է, որ այս տարի շուրջ 40.000 առաջին դասարանցի կգնա դպրոց»,–ասաց Պողոսյանը։
«Չեմ կարծում, որ վաղը «haytru.emis.am» կայքում աշակերտների հայտագրման շատ մեծ հոսք կլինի, ամեն դեպքում մենք պատրաստ ենք։ Միայն թե օտարերկրյա քաղաքացիներն իրենց երեխաներին պետք է անպայման այստեղ հաշվառեն, հանրային ծառայության համարանիշ ունենան կամ դրանից պաշտոնապես հրաժարվելու տեղեկանք, որի միջոցով կարողանան իրենց երեխաների հայտագրել դպրոց»,–ասաց նա։
Նշենք, որ հայտագրումից հետո ծնողները պետք է գնան դպրոց և դիմում գրեն տնօրենի անունով, համապատասխան փաստաթղթեր ներկայացնեն։ Դա պետք է անել մինչև սեպտեմբերի 5–ը, հակառակ դեպքում հայտը կչեղարկվի։