ԵՐԵՎԱՆ, 10 հուլիսի – Sputnik. Ռուսական օդատիեզերական ուժերն անցած օրվա ընթացքում ոչնչացրել են ուկրաինական երկու անգար՝ ամերիկյան M777 հաուբիցներով, որոնցից գնդակոծել են Դոնեցկը։ Այսօր հայտնել են Ռուսաստանի պաշտպանության նախարարությունում:
«Օպերատիվ-մարտավարական և բանակային ավիացիան, հրթիռային զորքերն ու հրետանին մեկ օրում ոչնչացրել են 17 կառավարման կետ, չորս դասակ «Գրադ» համազարկային կրակի ռեակտիվ համակարգեր, ինչպես նաև Կոնստանտինովկայի շրջանում երկու անգար՝ դրանցում թաքցված ԱՄՆ-ի արտադրության M777 հաուբիցներով, որոնցից գնդակոծվել են Դոնեցկի բնակելի թաղամասերը։ Ոչնչացվել են հրետանու ստորաբաժանումներ 42 շրջանների կրակակետերում, ինչպես նաև զինված ուժերի կենդանի ուժ և ռազմական տեխնիկա 143 շրջաններում», - հայտնել են գերատեսչությունում:
Նշվում է, որ անձնակազմի մեծ կորուստները լրացնելու համար ուկրաինական ռազմական հրամանատարության կողմից աճել են անպատրաստ պահեստազորայինների առաջին գիծ ուղարկելու դեպքերը։ Նրանց հարկադրաբար հավաքագրում են Խարկովի, Դնեպրոպետրովսկի ու Պոլտավայի մարզերում:
Բացի այդ, ՌԴ օդատիեզերական ուժերը մեկ օրում ոչնչացրել են կառավարման երեք կետ, կենդանի ուժ ու ռազմական տեխնիկա 16 շրջաններում:
ՌԴ օդատիեզերական ուժերի Սու-35Ս կործանիչները խոցել են Ուկրաինայի օդային ուժերի երկու Սու-25 ինքնաթիռ, ինչպես նաև մեկ ՄիԳ-29 ինքնաթիռ:
«Ընդհանուր առմամբ հատուկ ռազմական գործողության անցկացման սկզբից ոչնչացվել են 242 ինքնաթիռ, 137 ուղղաթիռ, 1506 անօդաչու թռչող սարք, 353 զենիթային հրթիռային համալիր, 3995 տանկ և այլ մարտական զրահամեքենաներ, համազարկային կրակի ռեակտիվ համակարգի 741 մարտական մեքենա, 3127 դաշտային հրետանի ու ականանետ, ինչպես նաև 4128 միավոր հատուկ ռազմական ավտոմոբիլային տեխնիկա», - նշված է Ռուսաստանի ռազմական գերատեսչության ամփոփագրում:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 137-րդ օրը։