ԵՐԵՎԱՆ, 9 հուլիսի – Sputnik. Էլեն Ասատրյանն ընտրվել է Գլենդելի քաղաքային խորհրդի անդամ՝ ութ թեկնածուների ընտրապայքարում զբաղեցնելով երկրորդ տեղը և քաղաքում դառնալով առաջին ներգաղթյալը, առաջին ամերիկահայը և ամենաերիտասարդ կինը, որը երբևէ ընտրվել է քաղխորհրդի անդամ։ Տեղեկությունը հայտնում է asbarez.com-ը։
Երդմնակալության արարողությունը տեղի կունենա հուլիսի 12-ին` ժամը 08։00-ին, Գլենդելի քաղխորհրդի դահլիճում։
39-ամյա Էլեն Ասատրյանը ստացել է 13,165 ձայն՝ շատ ավելին, քան ընտրվելիս ստացել էին նախկին քաղաքապետներ Արա Նաջարյանը և Վրեժ Աղաջանյանը, և Գլենդելում պատմական ռեկորդ է սահմանել՝ բաց մանդատ չունեցող մրցապայքարում առաջին իսկ մասնակցությամբ ստանալով ավելի շատ ձայներ, քան գործող խորհրդի անդամները։
«Մենք կերտում ենք Գլենդելի նոր պատմությունը։ Կշարունակենք միասին աշխատել, որպեսզի կառուցենք այնպիսի քաղաք, որը կծառայի բոլորիս, և քաղաքապետարան, որն իսկապես ժողովրդի տունը կլինի»,- ասել է Ասատրյանը։
Հիշեցնենք` ապրիլի 6-ին Գլենդելի քաղաքապետ է ընտրվել Արտաշես Քասախյանը։ Քաղաքային իշխանությունը նրանից առաջ ղեկավարել են նաև Վրեժ Աղաջանյանը, Վարդան Ղարպետյանը, Զարեհ Սինանյանը և այլ հայեր։