ԵՐԵՎԱՆ, 8 հուլիսի – Sputnik. Նարայի պրեֆեկտուրայի ոստիկանությունում 90 հոգուց բաղկացած հատուկ քննչական խումբ է ստեղծվել Ճապոնիայի նախկին վարչապետ Սինձո Աբեի սպանությունը հետաքննելու համար։ Տեղեկությունը հայտնել են իրավապահ մարմինների ներկայացուցիչները։
«Խումբը կգլխավորի քրեական գործերով դեպարտամենտի ղեկավարը», - ասել են նրանք:
Հիշեցնենք` Սինձո Աբեն մահացավ այսօր։ Նախկին ծովագնաց 41-ամյա Տեցույա Յամագամին Ճապոնիայի Նարա քաղաքի փողոցում երկու անգամ կրակել էր նրա հետևից։ Աբեն հրազենային վնասվածք էր ստացել պարանոցի և կրծքավանդակի շրջանում։
Ճապոնական լրատվամիջոցները հայտնում են, որ կրակողը երեք տարի (մինչև 2005 թվականը) ծառայել է երկրի ծովուժում։