ԵՐԵՎԱՆ, 8 հուլիսի – Sputnik. «Դիմադրություն» շարժման անդամներն ու նրանց կողմնակիցները Ֆրանսիայի հրապարակում հերթական հանրահավաքը կիրականացնեն հուլիսի 15-ին ժամը 19։30–ին։ Այս մասին երթից հետո հայտարարեց շարժման անդամ, ԱԺ «Հայաստան» խմբակցության պատգամավոր Արամ Վարդևանյանը։
Հայտնել էինք, որ «Դիմադրություն» շարժման անդամներն ու նրանց կողմնակիցները Ֆրանսիայի հրապարակում հերթական հանրահավաքն իրականացրին, այնուհետև մեկնարկեց երթ։
«Մեր ընկեր Իշխանն արդեն կլինի Հայաստանում, այդ օրը կներկայացնի եվրոպական երկրներում ունեցած իր հանդիպումների արդյունքները։ Շաբաթվա ընթացքում էլ ակցիաներ, գործողություններ կլինեն։ Ոչ ոք անսխալական չէ, ընդդիմությունն էլ է սխալներ անում, սակայն մեր այդ սխալների պատճառով հազարավոր զոհեր չեն եղել, հայրենիքն էլ չի կործանվել։ Այսպիսով`մենք պայքարելու ենք մինչև վերջ»,– նշեց Վարդևանյանը։
Նա վստահեցրեց, որ «առանց Նիկոլ Հայաստան» լինելու է ու իրենց առջև դրված նպատակներին հասնելու են, քանի որ դրանք համազգային ու համախմբող են։
Հավաքվածները վանկարկեցին «Միությո՛ւն, պայքա՛ր, հաղթանա՛կ», «Առանց Նիկոլ Հայաստա՛ն», «Պայքա՛ր» և այլն։
Հիշեցնենք` ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո Հայաստանում բողոքի ալիք բարձրացավ։
Ապրիլի 22-ին Իշխան Սաղաթելյանն ազդարարեց վարչապետին ու նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում ընդդիմությունը բազմահազարանոց հանրահավաք անցկացրեց։ Մասնակիցները վրաններ ու բարիկադներ տեղադրեցին, և մայիսի 2-ից սկսվեցին անհնազանդության ակցիաները։
Հունիսի 14-ին Սաղաթելյանը հայտարարեց, որ վրանային ավանը լիարժեք կատարել է իր գործը, և հունիսի 15-ին վրանները հավաքեցին: Դա, սակայն, ընդդիմադիրի խոսքով, ամենևին էլ պայքարի ավարտ չի նշանակում. նրանք շարունակելու են անհնազանդության ակցիաներն ու երթերը, գնալու են մինչև վերջ: