ԵՐԵՎԱՆ, 8 հուլիսի – Sputnik. ԱՄՆ–ն այսօր կհայտնի Ուկրաինային մոտ 400 մլն դոլարի ռազմական օգնություն տրամադրելու մասին, որի մեջ ներառվելու է մեծ հեռահարության բարձր ճշգրտության սպառազինություն։ Այս մասին ճեպազրույցի ժամանակ լրագրողներին հայտնել է Պենտագոնի բարձրաստիճան պաշտոնյան, նրա խոսքերը մեջբերել է ՌԻԱ Նովոստին։
«Այսօրվա փաթեթի շրջանակում հիմնականում ուշադրություն է դարձվում մեծ հեռահարության բարձր ճշգրտության զինատեսակներին։ Տվյալ դեպքում խոսքը HIMARS համազարկային կրակի ռեակտիվ համակարգերի մատակարարումների մասին է»,– նշել է ԱՄՆ պաշտպանության նախարարության ներկայացուցիչը` ներկայացնելով Կիևին տրամադրվելիք ռազմական օգնության նոր փաթեթը։
Նա ընդգծել է, որ նմանատիպ օգնության ընդհանուր ծավալը մոտ 400 մլն դոլարի կարող է հասնել։ Փաթեթի մեջ, ի թիվս այլ բաների, կներառվի նաև լրացուցիչ հազար 155 միլիմետրանոց հրետանային զինամթերք։
Ռուսաստանն ավելի վաղ ՆԱՏՕ–ի երկրներին բողոքի նոտա էր հղել Ուկրաինային սպառազինություն մատակարարելու համար։ ՌԴ ԱԳ նախարար Սերգեյ Լավրովը նշել է, որ ցանկացած բեռ, որն Ուկրաինայի համար ռազմամթերք կներառի, Ռուսաստանի համար օրինական թիրախ կդառնա։ ՌԴ արտաքին քաղաքական գերատեսչությունում հայտարարել են, որ ՆԱՏՕ–ի երկրները «կրակի հետ են խաղում» Ուկրաինային զենք մատակարարելով։ Վլադիմիր Պուտինի մամուլի խոսնակ Դմիտրի Պեսկովն էլ ընդգծել է, որ Ուկրաինային զենք մատակարարելը չի նպաստում ռուս–ուկրաինական բանակցությունների հաջողությանը և բացասական ազդեցություն կունենա դրա վրա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 135-րդ օրը։