ԵՐԵՎԱՆ, 7 հուլիսի – Sputnik. Նիկոլաևի մարզում վարձկանների տեղակայման կետն ու Օչակովի շրջանում ուկրաինական ստորաբաժանումների պատրաստության կենտրոնը, ինչպես նաև կառավարման վեց կետերն ու զինամթերքի երեք պահեստները մեկ օրում ոչնչացվել են ՌԴ ՕՏՈւ–ի բարձր ճշգրտության զենքով։ Այս մասին հայտնում է ՌԴ ՊՆ–ն։
ՌԴ ՕՏՈւ–ն ԴԺՀ–ում խոցել է զինամթերքի պահեստ, որտեղ Ուկրաինայի մինչև 350 զինվորական է եղել։ ՊՆ–ում նշել են, որ այդ ֆոնին 80-րդ դեսանտագրոհային բրիգադի զինծառայողները հրաժարվում են մասնակցել մարտական գործողություններին և զանգվածաբար դասալքության են դիմում դեպի թիկունքային շրջաններ։
ՌԴ գերատեսչությունում հայտնել են նաև, որ Ուկրաինայում «Կրակեն» գումարտակին հրահանգվել է շարժվել դեպի Պոկրովսկոյե, սակայն ազգայնականների հրամանատարությունն ու զինյալները հրաժարվել են կատարել հրամանը։
Բացի այդ, ինչպես նշել են ՊՆ–ում, «Ուկրաինայի ԶՈւ–ի ղեկավարությունը հրաման է տվել վիրավոր զինծառայողների բուժման ժամկետների կրճատման և ստորաբաժանումների կորուստները համալրելու համար առանց վերականգնման նրանց մարտական գործողությունների շրջան ուղարկելու մասին»։
ՌԴ ՊՆ–ն նշել է, որ ՌԴ ՕՏՈւ բարձր ճշգրտության հրթիռային հարվածով ձախողել են ուկրաինացի զինվորականների՝ դրոշը Զմեինի կղզի հասցնելու փորձը։
«Առավոտյան ժամը 5-ի սահմաններում մոտարանավակից կղզի են դուրս եկել ուկրաինացի մի քանի զինծառայող, որոնք լուսանկարվել են դրոշի հետ։ ՌԴ ՕՏՈւ–ի ինքնաթիռով Զմեինի կղզուն անմիջապես հարված է հասցվել, որի հետևանքով ուկրաինացի զինծառայողների մի մասը ոչնչացվել է։ Կենդանի մնացածները փախուստի են դիմել Օդեսայի մարզի Պրիմորսկոյե բնակավայրի ուղղությամբ», – նշում են ՌԴ ՊՆ–ից։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 134-րդ օրը։