ԵՐԵՎԱՆ, 7 հուլիսի - Sputnik. Ռուսաստանն Ուկրաինայում, մեծ հաշվով, դեռ ոչինչ չի սկսել, Պետական Դումայի խմբակցությունների ղեկավարների հետ հանդիպման ժամանակ ասել Է Ռուսաստանի նախագահ Վլադիմիր Պուտինը՝ անդրադառնալով Արևմուտքում հնչող այն հայտարարություններին, թե Ռուսաստանին Դոնբասում պետք է հաղթել մարտի դաշտում։
«Այսօր մենք լսում ենք, որ մեզ ուզում են հաղթել մարտի դաշտում։ Դե, ի՞նչ ասես։ Թող փորձեն։ Մենք արդեն շատ ենք լսել, որ Արևմուտքն ուզում է պատերազմել մեզ հետ մինչև վերջին ուկրաինացին։ Դա ողբերգություն է ուկրաինացի ժողովրդի համար։ Բայց երևում է՝ ամեն ինչ հենց դրան է գնում»,-ասել է Պուտինը։
ՌԴ նախագահի խոսքով՝ Արևմուտքը փորձում է ամբողջ աշխարհի վզին փաթաթել տոտալիտար լիբերալիզմի և համատարած արգելքի մոդելը։
«Նման մոդելը՝ տոտալիտար լիբերալիզմի մոդելը, ներառյալ տխրահռչակ «չեղարկման մշակույթը», համատարած արգելքները, պարտադրում են ամբողջ աշխարհին։ Փորձում են պարտադրել։ Բայց ճշմարտությունն ու իրականությունն այն է, որ շատ երկրների ժողովուրդներ նման կյանք և նման ապագա չեն ցանկանում։ Իսկապես ձգտում են ոչ թե ձևական-դեկորատիվ, այլ բովանդակալից, իրական ինքնիշխանության։ Եվ պարզապես հոգնել են ծնկաչոք մնալուց, ստորանալուց նրանց առջև, ովքեր իրենց բացառիկ են համարում։ Եվ դեռ ի վնաս իրենք իրենց սպասարկել նրանց շահերը»,-ասել է Պուտինը։
Ռուսաստանի բոլոր փորձերը՝ երկխոսություն վարել Արևմուտքի հետ հուզող թեմաների շուրջ, այդ թվում՝ ռազմավարական կայունության վերաբերյալ, անտեսվել են, հայտարարել է ՌԴ նախագահը։
«Եվրոպայում հավասար անվտանգության համակարգ ստեղծելու մեր առաջարկները մերժվել են, հակահրթիռային պաշտպանության խնդրի շուրջ համատեղ աշխատանքի նախաձեռնությունները մերժվել են, ՆԱՏՕ-ի ընդլայնման անընդունելիության մասին նախազգուշացումները, հատկապես՝ Խորհրդային Միության նախկին հանրապետությունների հաշվին, անտեսվել են»,-ասել է Պուտինը:
Բացի այդ, նախագահը նշել է, որ Ռուսաստանի հնարավոր ինտեգրումը դաշինքին անդամ երկրների կողմից ընկալվել է որպես անհեթեթություն: