Փաշինյանը ԿԳՄՍ նախարարին հանձնարարեց հնարավորինս արագ նորոգել Բջնիի եկեղեցու պատը

ԵՐԵՎԱՆ, 7 հուլիսի – Sputnik. Բջնիի 11-րդ դարի Սբ. Աստվածածին եկեղեցու պատը վթարային վիճակում է։ Այս մասին այսօր կառավարության նիստում հայտարարեց ՀՀ վարչապետ Նիկոլ Փաշինյանը` նշելով, որ վերջին օրերին եղել է ՀՀ տարբեր վայրերում ու մի շարք արձանագրումներ արել։

«Այնտեղ ես արձանագրեցի, որ հենքեր են դրել, որպեսզի պատը չփլուզվի։ Ես ԿԳՄՍ նախարարին հանձնարարել եմ իրականացնել այդ ծրագիրը։ Բարեբախտաբար պարզվեց, որ նման նախագիծ կա պատրաստի, և պետք է ընդամենը ֆինանսավորում ապահովել»,- աաց Փաշինյանը` Վահրամ Դումանյանին հանձնարարելով հնարավորինս արագ նորոգել եկեղեցու պատը։

Փաշինյանը հայտնեց, որ հանձնարարականներ է տվել նաև Բջնիի ամրոցի վերաբերյալ։

ՀՀ վարչապետը նաև հայտնեց` տեղում արձանագրել է, որ խնդրահարույց է նաև հուշարձանի ներկայացման հնարավորությունը։ Նրա խոսքով` ամրոցը թաքնված է տարբեր այգիների մեջ, ուստի կարիք կա բանակցելու սեփականատերերի հետ` հուշարձանն առավել ներկայանալի դարձնելու համար։

Փաշինյանը հայտնեց նաև, որ կառավարությունը նորոգում է Հրազդան-Բջնի ճնապարհը, որը տարիներ շարունակ չի նորոգվել։ Արդյունքում, ըստ նրա, զբոսաշրջային պոտենցիալը Աղվերան-Ծաղկաձոր հատվածում էականորեն կակտիվանա։

Հաջորդ տարի ծրագրվում է նաև Չարենցավան-Աղվերան ճանապարհի նորոգումը։