ԵՐԵՎԱՆ, 7 հուլիսի – Sputnik. Հայտնի պրոդյուսեր և երգիծաբան Գարիկ Մարտիրոսյանի կինը՝ Ժաննա Լևինան, որն այս օրերին Հայաստանում է, լուսանկար է հրապարակել ու պատմել Հայաստանի մասին։ Լուսանկարում Լևինան կանգնած է մի հսկա քարի հետևում, որը ներկված է հայկական դրոշի գույներով։
«Եկել եմ բարձր լեռների և ձյունաճերմակ ամպերի երկիր, հյութալի նռան, հասած ծիրանի ու խաղողի երկիր, ամենահամեղ ջրի ու ամենահաճելի կոնյակի երկիր, երաժշտության, պարերի ու սրտաբուխ խնջույքների երկիր, բարի, պայծառ, ուժեղ, կենսուրախ, տաղանդավոր մարդկանց երկիր, հոգով ինձ հարազատների ու ընկերների երկիր։ Բարև, արևոտ, գեղեցիկ, հյուրընկալ Հայաստա՛ն»,- գրել է Լևինան։
Նրա հետևորդներին շատ է դուր եկել լուսանկարը։ Նրանք բազմաթիվ դրական մեկնաբանություններ են գրել ու հաճելի հանգիստ մաղթել Լևինային։
«Դուք մեր սիրելի Ժաննա հարսիկն եք, բարի գալուստ։ Միշտ ուրախ ենք լավ մարդկանց ընդունել մեր երկիր։ Բարի հանգիստ, գեղեցկուհի՛»,- գրել են նրանք։
Լևինան հաճախ է Հայաստան այցելում ընտանիքի հետ։
Հիշեցնենք` Գարիկ Մարտիրոսյանն արդեն 24 տարի է՝ ամուսնացած է Ժաննա Լևինայի հետ։ Նրանք երկու երեխա ունեն՝ 1 աղջիկ` Ժասմինը, և մեկ տղա` Դանիելը։