ԵՐԵՎԱՆ, 6 հուլիսի – Sputnik. Շվեդիանու Ֆինլանդիան, ՆԱՏՕ-ին միանալով, թույլ կտանն իրենց ներքաշել Ռուսաստանի դեմ աշխարհաքաղաքական խաղի մեջ, նրանք կհանդիպեն Մոսկվայի պատասխան արձագանքին։ Այս մասին հայտարարել է ՌԴ ԱԳՆ տեղեկատվության և մամուլի դեպարտամենտի փոխտնօրեն Ալեքսեյ Զայցևը, հայտնում է ՌԻԱ Նովոստին։
Նա ընդգծել է, որ Հելսինկիի և Ստոկհոլմի կողմից դաշինքին անդամակցելու արձանագրության ստորագրումը Եվրոպայում քաղաքական և ռազմական լարվածության սրման ևս մեկ քայլ է։ «Նրանք պետք է հասկանան, որ Հյուսիսատլանտյան դաշինքին միանալը կխորացնի իրադրությունը Արկտիկայում և Բալթիկայում»,–ասել է նա:
Զայցևի խոսքով՝ այդ դեպքում զգալիորեն նեղանալու են խաղաղ համագործակցության հնարավորությունները, որն այժմ խիստ պահանջված է աշխարհի այդ հատվածում:
«Ցավալի է, որ երկու անկախ պետություն, որոնց ձայնը միշտ լսելի է եղել, և որոնք նշանակալի ներդրում են ունեցել սառը պատերազմից հետո ռազմական անվտանգության կարևորագույն տարրերի կայացման գործում, համաձայնել են կիսել ՆԱՏՕ-ի մերձճակատային շրջագծի ճակատագիրը, ըստ էության՝ թույլ են տվել ներքաշել իրենց Ռուսաստանի դեմ ուրիշի աշխարհաքաղաքական խաղի մեջ»,-ասել է դիվանագետը:
Նա հավելել է, որ Հելսինկին և Ստոկհոլմը, պատրաստվելով մտնել ՆԱՏՕ, պետք է գիտակցեն հետևանքները. այդ պետություններում Ռուսաստանի անվտանգությանը սպառնալիք ստեղծելու համար ձեռնարկվող ցանկացած միջոցառում անխուսափելիորեն պատասխան արձագանքի կարժանանա։