ԵՐԵՎԱՆ, 6 հուլիսի - Sputnik. ԱԺ-ում Կարեն Սարուխանյանը կփոխարինի ՔՊ խմբակցության պատգամավոր Արթուր Դավթյանին, որը նշանակվել է Վճռաբեկ դատարանի հակակոռուպցիոն պալատի քաղաքացիական գործերի քննության դատական կազմի դատավոր։
Sputnik Արմենիայի հետ զրույցում Կարեն Սարուխանյանը նշեց, որ ամենայն հավանականությամբ, կգնա պետաիրավական հանձնաժողով, հետո ժամանակը ցույց կտա։
Այս ընթացքում (Սարուխանյանը 2021-ի դեկտեմբերին ազատվել է ԱԻ փոխնախարարի պաշտոնից - խմբ.) հասցրել է հանգստանալ, իրականացնել այն բոլոր ծրագրերը, որոնք ժամանակի սղության պատճառով հետաձգվել էին ավելի քան 4 տարի:
«Անկեղծ հանգստացել եմ՝ վերջին 4 տարիներին տարբեր պաշտոններ զբաղեցնելով անձնական շատ հարցեր թողել էի, չէի հասցրել կյանքի կոչել, այս ընթացքը դրանք իրականացնելու ընթացք էր»,-նշեց Կարեն Սարուխանյանը վստահեցնելով՝ ԱԺ է վերադառնում նոր ուժով ու նոր ծրագրերով: «Կաշխատեմ հիմնականում մեր՝ Շիրակի մարզի ու մարզի բնակիչների համար ու կփորձեմ բոլորին հնարավորինս օգտակար լինել ու լինել իրենց սրտի պատգամավոր»,-հավելեց նա:
Հիշեցնենք, որ Կարեն Սարուխանյանը մի շարք պաշտոններ է զբաղեցրել. եղել է ՀՀ արտակարգ իրավիճակների նախարարի տեղակալ (2021 սեպտեմբեր - դեկտեմբեր), 2018-ի հունիսից 2019-ի հունվարը եղել է ՀՀ Շիրակի մարզպետ, 2018 թվականի դեկտեմբերի 9-ին ԱԺ պատգամավոր է ընտրվել «Իմ քայլը» կուսակցությունների դաշինքի ցուցակով։
2021 թ. ընտրվել է «Քաղաքացիական պայմանագիր» կուսակցության` Գյումրու տարածքային խորհրդի նախագահ։