«ԵՄ-ն համարում է, որ իրե՞ն էլ են կուտ տալիս». ընդդիմադիրները կգնան ԵՄ գրասենյակի մոտ

ԵՐԵՎԱՆ, 4 հուլիսի – Sputnik. Երևանի Բաղրամյան-Դեմիրճյան խաչմերուկում հավաքված ընդդիմադիրները շարժվելու են դեպի Հայաստանում ԵՄ-ի գրասենյակ, քանի որ ասելիք ունեն Եվրամիությանը։ Տեղեկությունը լրագրողների հետ զրույցում հայտնեց «Դիմադրություն» շարժման անդամ Արամ Վարդևանյանը։

Բացի այդ, ԵՄ-ի մոտ հայ ռազմագերիների հարցն են բարձրացնելու։ Վարդևանյանի խոսքով` պետք է ճշտեն ԵՄ-ի դիրքորոշումը, քանի որ երկիրը, որն իրեն համարում է եվրոպական ու ժողովրդավարական, չի կարող ունենալ ռազմագերիներ, որոնց խոշտանգում են։ Ընդդիմադիրներին հետաքրքրում է` ԵՄ-ն այդտեղ անելիք չունի՞, չպե՞տք է սանկցիաներ կիրառի, թեկուզ՝ ձևական։

Վարդևանյանը նշեց` եթե ԵՄ-ն ուզում է, ապա լուծում է որոշ հարցեր, սակայն գերիների և ՀՀ դատական համակարգում տեղի ունեցածի մասին լռում է։

Հիշեցնենք, որ հունիսի 20-ին հրավիրված ասուլիսում Բարձրագույն դատական խորհրդի նախկին նախագահ Ռուբեն Վարդազարյանը հրապարակել էր ԲԴԽ նախագահի պարտականությունները կատարող Գագիկ Ջհանգիրյանի հետ ունեցած զրույցի ձայնագրությունը, որում մի շարք հետաքրքիր դրվագներ են բացվում՝ կապված դատական համակարգի վրա ճնշումներ գործադրելու հետ։

Անցած տարվա փետրվարին արված գաղտնի ձայնագրությունում Գագիկ Ջհանգիրյանը հորդորում է այն ժամանակ դեռ ԲԴԽ նախագահի պաշտոնը զբաղեցնող Ռուբեն Վարդազարյանին հրաժարական տալ և խոսում է քրեական գործերի ընթացքին միջամտելու մասին։ Նա նշում է, որ կարող է քրեական գործեր կարճել տալ, քրեական գործեր հարուցել, «սա կջրենք», «նա կջրենք»։ Հանրային հեռուստաընկերության եթերում Ջհանգիրյանը պարզաբանել էր, թե «կուտ է տվել» նման բաներ ասելով։

Հունիսի 30-ին հայտնի դարձավ, որ Գագիկ Ջհանգիրյանը կարգապահական պատասխանատվության չի ենթարկվի. վարույթի հարուցումը մերժվեց։

Հուլիսի 1-ին Ջհանգիրյանը հրաժարվեց ԲԴԽ անդամի պաշտոնից։