Ամերիկյան երեք նավթային ընկերություններ դադարեցնում են աշխատանքն Իրաքյան Քուրդիստանում

ԵՐԵՎԱՆ, 4 հուլիսի – Sputnik. Նավթի և գազի արդյունահանման ոլորտում ամերիկյան երեք սպասարկման ընկերություններ՝ աշխարհում խոշորագույն Schlumberger-ը, ինչպես նաև Baker Hughes-ը և Halliburton-ը Իրաքի նավթի նախարարությանը պաշտոնապես տեղեկացրել են Իրաքյան Քուրդիստանում աշխատանքի դադարեցման մասին, հայտնում է ՌԻԱ Նովոստին՝ հղում անելով գերատեսչության մամուլի ծառայությունը:

Նավթի նախարարությունը հաստատել է, որ երեք ընկերությունները նաև «չեղարկում և խզում են ընթացիկ թենդերներն ու պայմանագրերը»։

Իրաքի Գերագույն դաշնային դատարանը 2022 թվականի փետրվարին 2005 թվականի Սահմանադրությանը անհամապատասխան է ճանաչել նավթի և գազի մասին օրենքը, որն ընդունվել էր Իրաքյան Քուրդիստանի կառավարության կողմից 2007 թվականին, և Էրբիլին պարտավորեցնում էր նավթի որոնումը, արդյունահանումն ու արտահանումը փոխանցել Իրաքի դաշնային կառավարության վերահսկողությանը: Դատարանը նաև վճռել է, որ Իրաքի նավթի նախարարությունն իրավունք ունի վիճարկել նավթային պայմանագրերի օրինականությունը, որոնք Իրաքյան Քուրդիստանի կառավարությունը կնքել է օտարերկրյա գործընկերների հետ:

Այդ որոշմանն ի պատասխան Իրաքյան Քուրդիստանի նախագահ Նեչիրվան Բարզանին կոչ է արել վերանայել դատարանի որոշումն այնպես, որ այն չխախտի ինքնավար շրջանի օրինական սահմանադրական իրավունքները: Դատարանի որոշումը, իր ներկայիս տեսքով, նախագահի կարծիքով` չի կարող իրագործվել գործնականում և միայն կխորացնի նավթագազային ոլորտում առկա հակասությունները Բաղդադի և Էրբիլի միջև:

Իրաքյան Քուրդիստանի և Բաղդադի միջև մի քանի տարի գործել է համաձայնագիր, որի համաձայն` Էրբիլն ամեն օր Բաղդադին էր փոխանցում 250 հազար բարել նավթ՝ փոխարենը ստանալով դրա իրացման շահույթի 17 տոկոսը: Սակայն հետագայում երկու կողմերն էլ միմյանց մեղադրեցին համաձայնագիրը չպահպանելու մեջ. Էրբիլը պնդում էր, որ Բաղդադը գումարը փոխանցում է ոչ լրիվ ծավալով և ոչ ժամանակին։ Իր հերթին Բաղդադը հայտարարում էր, որ Էրբիլը, խախտելով պայմանավորվածությունը, նավթի մեծ մասն ինքնուրույն է վաճառում արտասահմանում։