ԵՐԵՎԱՆ, 1 հուլիսի – Sputnik. Հնարավոր է, որ ընդիմադիր պատգամավորներ Իշխան Սաղաթելյանի և Վահե Հակոբյանի պաշտոնները թափուր մնան: ԱԺ-ում լրագրողների հետ զրույցում այս մասին ասաց ՔՊ խմբակցության պատգամավոր Արթուր Հովհաննիսյանը:
Հայտնել ենք, որ խորհրդարանում այսօր գաղտնի քվեարկություններով դադարեցվեցին ԱԺ նախագահի պաշտոնում՝ Իշխան Սաղաթելյանի, և տնտեսական հարցերի մշտական հանձնաժողովի նախագահի պաշտոնում՝ Վահե Հակոբյանի լիազորությունները։
«Այս պահին քննարկման փուլում է ընդդիմադիրներին մանդատներից զրկելու հարցը, ինչը պայմանավորված է նրանց հետագա գործողություններով և պահվածքով։ ԱԺ-ի ձևավորման փուլում էր անհրաժեշտություն, որ բոլոր պաշտոնները լրացվեն, իսկ հետագայում նման խնդիր չի առաջանում ո՛չ Սահմանադրությամբ, ո՛չ էլ ԱԺ կանոնակարգ օրենքով։ Այսինքն` ընդդիմադիրները կարող են նոր անձանց առաջարկել, իսկ ՔՊ-ն իրավունք ունի ընտրելու կամ չընտրելու նրանց»,- ասաց Հովհաննիսյանը։
Նա հավելեց, որ եթե ընդդիմադիրները սահմանված ժամկետում նոր թեկնածուներ չառաջադրեն վերոհիշյալ երկու պաշտոններում, ապա օրենքով դրանք անցնում են իշխանական մեծամասնությանը։ Սակայն իշխանությունը, ըստ պատգամավորի, չի պատրաստվում լրացնել այդ պաշտոնները։
Հարցին` ի՞նչ կլինի, եթե ՍԴ-ում քննարկեն այդ հարցը` իշխանական պատգամավորը պատասխանեց, որ նման նախադեպ է եղել տարիներ առաջ, երբ մարդու իրավունքների հանձնաժողովի նախագահ Նաիրա Զոհրաբյանին զրկել են պաշտոնից։ Այդ ժամանակ Զոհրաբյանը դիմեց ՍԴ, սակայն որևէ արդյունքի չհասավ, քանի որ, ըստ Հովհաննիսյանի, այդ հարցը բացառապես ԱԺ ներքին հարցն է։